LA buaina hmet mit turin Trump-a’n National Guard 2,000 dah

LA buaina hmet mit turin Trump-a’n National Guard 2,000 dah
US President Donald Trump-a chuan lehkha mumal nei lova an rama pemte dap chhuah beihpui thlaktute lo tawng leta buaina chhuak hmeh mih a nih theih nan Los Angeles-ah National Guards 2,000 a dah lut.
Ramri chungchanga a sorkar hotu, Tom Homan-a chuan Inrinni khan Fox News hnenah, “Los Angeles hi him takin kan siam dawn,” a ti.
Californian khawpuiah hian a ni hnih nan Inrinni khan Latino district-a chengte leh Immigration & Customs Enforcement (ICE) federal agent-te an intibuai leh a. Paramount district-ah hian rear gas leh tiang hmanga inhnawh darh a ngai hial.
ICE beihpui an thlaknaah hian kar liam ta khan LA-ah mi 118 man an ni a, heng zinga 44 hi Zirtawpnia man an ni a. California Governor Gavin Newsom chuan mi dap hi demin ‘a rawng lutuk’ a ti.
Newsom-a hian Inrinni khan Trump-a biain minute 40 chuang an inkawm tih a thupuangtu chuan CBS News a hrilh a. An inbiak dan kimchang erawh a sawi lo.
Paramount hi a muanawm khat viaua lang chungin lungawi lo leh dan kengkawhtute hi an la inep reng a. Tear gas leh thil halna khu avangin a boruak pawh a la ipik hle.
LA county sheriff-te chuan minute tin deuhthaw thil puak leh tear gas an kap chhuak a. A bulhnaia awmte chuan pem lutte hi tual chhung sumdawnna in chhungah chhuah hlauvin an tawm niin an sawi.
Paramount-a cheng 80% Hispanic an ni.
White House-in thuchhuah a siamah, “Tun hnaiah ICE Officer leh Federal Law Enforcement Agent-ten Los Angeles, California-a mi thawn haw turte an dapnaah beih let an lo tawk.
“Heng beihpui thlakna hi dan lova US-a awm leh lutte tihtawpna tur a ni a. Tharum thawhna thlengah hian California-a Democrat hruaitute chuan an khua leh tuite dik lo taka hum nan hma an la a, hei vang hian President Trump-a chuan Presidential Memorandum ziakin dan kenkawhna awm lo hmachhawn turin National Guards 2,000 tirhna tur a ti ta a ni,” an ti.
FBI Deputy Director Dan Bongino-a pawhin lungawi lote chu vauin, “Buaina i siam a nih chuan handcuff kan pe ang che. Dan leh thupek kenkawhna kalpui a ni ang,” tiin X-ah a tar lang.
US president hi an ram chhunga National Guard tir thei niin a bikin ‘helna ang chi hmeh mih nan’ a tir chhuak thin.