NBA play-of first round, game khatnaa chak tawh Los Angeles Lakers chuan Houston Rockets an hneh nawn leh a, series-ah 2-0 in hma an hruai.
LA Lakers hian season kal meka an tan point thawkchhuak hnem ber Luka Doncic leh an player langsar Austin Reaves te chu hliam vangin an chhawr thei lo zui zel. An player pawimawh pahnih awm lo mah se player ropui LeBron James a chetha chhunzawm zel thung a, James hian Rockets lakah Lakers a chakpui nawn leh.
Play-off game hnihnaah La Lakers in Houston Rockets lakah bul an tan tha a, quarter khatnaah point 7 in an sang nghal. Bul an tan that hi an hlawkpui a, hnehna an chan nawn leh theih phah. Bul tan tha lo mah se quarter hnihnaah Rockets an khel tha a, point liin an chungnung ve thung. Lakers hian point thuma hmahruai chungin chawlhlawk an hmang.
Chawlhlawk hnu lamah Lakers an khel tha chhunzawm a, quarter thumnaah point liin an chungnung zui leh a, point 7 bawkin hma an hruai nawn leh. Quarter hnuhnung berah chak ngei tumin an innawr tawn nasa viau naa point 26 ve ve thawkchhuakin, chungnung zawk an awm thei lo. Inkhel hmuhnawm takah hian LA Lakers in point 101-94 in hnehna an chang a, series ah 2-0 in hma an hruai ta a ni.
Rockets laka an chak nawn leh theih nan Lakers tan kum 41 mi, All-Star a vawi 22 ngawt tel tawh LeBron James a chetha leh viau a, point 28 thawkchhuakin ball sawhlet vawi riat a dawn bakah assist vawi sarih a nei tling bawk. Houston Rockets tan game khatnaa khel thei lo Kevin Durant a inlan a, point 23 thawkchhuak bawk mah se LA Lakers laka an tlawm tur a chhanhim zo chuang lo thung.
LA Lakers an chak zawn laiin inkhel dangah San Antonio Spurs chu Portland Trial Blazers lakah an tlawm a, series ah 1-1 in an inhnehtawk chiah thung.
Blazers laka hian Spurs player pawimawh Viktor Wembanyama chuan bul tanin, point 5 thawkchhuak hman bawk mah se hliam vangin a khel thei lo thuai a, second quarter-ah lakchhuah a ngai nghal. Wembanyama hi game thumnaah pawh a inlan thei dawn lo niin tarlan a ni.
7ft 4in zeta sang, season kal mekah ‘NBA defensive player of the year’ a thlan Wembanyama tel lova hun rei zawk inlan Spurs hi Blazers lakah 106-103 in an tlawm zui ta hial a. Series ah 1-1 a inhnehtawk in, second round luh tuma inelna boruak a nung thar leh zual.
Inkhel dangah Philadelphia 76ers chuan an khingpui Boston Celtics chu point 111-97 in an lehthal a, series ah 1-1 a ni.
LA Lakers an chak zawn
