Ningani zing khan NBA regular season khelh chhunzawm a ni a, inkhel hmuhnawm takah LA Lakers chuan an khingpui LA Clippers an lehthal. Inkhel dangah champion lai Denver Nuggets in hnehna an chang bawk.
Los Angeles Lakers hian LA Clippers lakah bul an tan chhe viau a, quarter hmasa pathumah hnufual zawkah an tang vek. Quarter khatnaah point khata an hnufual hnuin, quarter hnihnaah point 13 zetin an hnufual a. Point 14 a hnufual chungin chawlhlawk an hmang.
Chawlhlawk hnu lamah LA Lakers an insiamtha nghal mai thei lova, quarter thumnaah point ngain hnufual zawkah an tang leh phawt. Quarter hnuhnung ber tir lamah hnufual zawk an ni hmasa leh a, point 21 zetin hnufual zawkah an tang hman. Heti zat zeta an hnufual vang hian tlawm ngei tura ngaih an ni hman. Mah se, inlehthalna lian an thlentir tlat thung.
Point 21 zeta an hnufual hnuin LeBron James leh a khelhpuite huaisen takin an inlan a, an khel tha ta tak zet. Quarter hnuhnung berah point an thawkchhuak zawn zawt zawt. Quarter hnuhnung berah hian point 23 zetin chungnung zawkah an tang ta mai a, an khingpuite hi point a, 116-112 in an hneh a, hnehna hlu bik an chang.
Clippers an hneh theih nan Lakers tan LeBron James a khel tha viau a, point 34 a thawkchhuak a, hen gzinga point 21 zet hi quarter hnuhnung bera a thawhchhuah a ni. Lakers tan hian Anthony Davis chuan point 20 a thawkchhuak a, ball sawhlet vawi 12 a dawng tling bawk.
Ningani zinga inkhel dangah champion lai Denver Nuggets chuan point 117-96 in an khingpui Sacramento Kings an hneh. Sacramento Kings an hneh tum hian Nikola Jokic chuan point 14 a thawkchhuak a, ball sawhlet vawi 14 a dawn bakah assist vawi 11 a nei tling bawk a, triple double a puitlin. Jokic hian NBA-ah triple-double bawi 124 zet a puitlin tawh a, hei hian player ropui a nihzia a tilang chiang hle.
Inkhel dangah Dallas Mavericks chuan point 136-125 in Toronto Raptors an hneh. Mavericks tan hian Luka Doncic chuan point 30 a thawkchhuak a, ball sawhlet vawi 11 a dawn bakah assist vawi 16 a nei bawk a, triple-doouble a puitlin.
LA Lakers in Clippers an lehthal
![](https://theaizawlpost.org/wp-content/uploads/tap_logo-min-large.jpg)