La Liga goal thun thei naupangber Yamal

La Liga goal thun thei naupangber Yamal
Granada muala fehchhuak Barcelona chuan Pathianni zanah tlawm an pumpelh hram a, sihnih faia an hnufual hnua 2-2 draw an sualchhuahna goal pakhat zawk suttu Lamine Yamal chuan league record thar siamin, La Liga history-a goal khungtu naupangber a ni.
Barcelona ‘comeback’ atana thawhhlawk rawlthar Yamal hian kum 16 leh ni 87-a upa ni chungin first half hun pekbelh minute khatna kal mek laiin mikhual siphurh pakhat a sut then a, club leh ram tana bul a tan chhoh mekna kawngah record thar dang a siambelh leh ta a ni.
Kum 15 leh ni 290 chiaha upa a nih lai kumin April thla khan he winger hian Real Betis lakah goal khungin, Barcelona tana bench atanga lut zinga goal thuntu naupangber a ni.
Nikum September thla Euro 2024 qualifying-a Georgia laka 7-1 hnehna an chan tuma a goal khat thawh hmangin Spanish national team tana inlan thei naupangber leh goal khung thei naupangber nihna a lo chang kawp tawh bawk.
La Liga lamah record thar siam lehin, tun season kal laiah hian Barca league game khelh tawh pakuaah a la inlan kim vek a, tah chuan starting line up vawinga changin, an match hnuhnung pahnihah luh hmasak hi a chang nghe nghe.
Barcelona academy product Yamal-a pa hi Moroccan niin, a nu hi Equatorial Guinea lam chhuak a ni thung a; kum 2007 July ni 13-ah piangin, kum nga mi a nih lai atanga Barca academy luhchilh a ni.
Spain senior squad-a koh zinga naupangber nihna chelh bawkin, Cyprus lakah first eleven a chang pha ngat a; a hnuah a chunga tarlan tak ang khian Georgia lakah ram tan goal a khung tan a; October thla international match pahniha Scotland leh Norway hmachhawn tura thlanchhuah Spain squad-ah a tel leh bawk.
Pathianni zan La Liga inkhelah Barcelona hian si an phur hma hle a, tan atanga minute khat em pawh an khelh tlin hma second 17-na lekah Bryan Zaragoza chuan Granada hmahruaina goal khungin, darkar chanve khelh tlin dawnah Zaragoza bawk hian sihnih faia mualneitu team hmahruaina goal a thawh leh ngat a ni.
Half time hma chiahin Yamal chuan Nou Camp club tana chawlhlawk tiphurawm turin an si phurh a sut then a; second half minute 85-ah Sergi Roberto chuan an mikhualnaa Barca point khat hlawhchhuahna goal khung ve leh nawlhin, team pahnih hi 2-2-in an inhnehtawk.
Xavi Hernandez-a team Barcelona hian point hnih an hloh then avangin pathumna an thawhsan zo lo a, hmahruaitu Real Madrid lakah point thuma hniamin, international break thlengin pahnihna Girona lakah point khatin an hniam chhunzawm dawn bawk a ni.
Real tan Bellingham vul zel
Sili faia Osasuna an sawpna inkhelah lei fuh Jude Bellingham chuan Real Madrid tan goal hnih khung lehin, kumin nipui laia Borussia Dortmund atanga euro maktaduai 103 (£88.5m)-a an lakluh hnu khan Spanish giants tan inelna hrang hranga match 10 a khelh tawhah goal 10 a khung tling a, a Madrid career bul tan dan a fuh cher cher hle.
Kum 20 mi lek la ni chungin Bellingham hian Spain leilungah hming a chher der tawh a; Inrinni La Liga match-ah pawh tan atanga minute kuana lekah goal hmahruai thawhtu niin, second half tir lam minute 54-ah sihnih faia mualneitu team hmahruaina goal a khung zui leh ngat a ni.
Santiago Bernabeu inkhelah hian minute 65-ah Vinicius Junior chuan Bellingham chhawkin goal khat a thawh ve a; minute nga a kal leh tihah Joselu chuan 4-0 hnehna tifamkim turin Real goal lina a khung a; hun pangngai tawp hma minute ruk la awmah Joselu hian goal hnih thun theihna hun remchang bawhpelhin penalty a chhuihlut lo.
Bellingham lamah bawk kirleh ila; Englishman hian season kal laiah belhkhawmin club leh ram tan match 12 a khel tling tawh a, Spanish giants tana a bul tan dan hi hriatreng a ni tawh ang.
Osasuna laka a goal hmasa zawk kha team goal ropui tak niin, kha goal luhna kawngah khan Dani Carvajal leh Luka Modric-te thuk takin an inrawlh.
Second half tir lama a goal hnihnaah Federico Valverde nena an thawhdunna tha hmuh tur awm thungin, one-two tuihnai zet hrinchhuah chance hlauhawm dan tuma tlanchhuak mikhual goalkeeper Sergio Herrera kapkarah tak a chhuihlut.
Birmingham City leh Borussia Dortmund midfielder hlui Belleingham hi minute 72-ah hahdam tura lakchhuah niin, a khelmual chhuahsan lai hi Madrid mipuiin ‘standing ovation’ nen an thlahliam nghe nghe.
Spanish La Liga table-ah Real Madrid hian khelh kua atanga point 24 rutin an hmahruaina an chhunzawm zel a; Inrinni zan inkhel dangah Cadiz muala 1-0 hnehna sualchhuak Girona chuan Barcelona lehpelin pahnihna an luah chho a; Pathianni zanah Catalan team hian Granada muala hnehna an chan zawh loh avangin pathumnaah an thu chhunzawm.