La Liga title race-ah Barca sang zel
Inrinniah Spanish La Liga standing-a a sang pahnihin khelmual an lut a, hmahruaitu Barcelona chak laiin an hnuai chiaha pahnihna luahtu Real Madrid erawh Mallorca khelmualah an tlawm a, team pahnih inthlauhna hi point sarih ngawtin an inthlau ta a, title race-ah an dinhmun an sawh nghet deuh deuh.
Atletico Madrid 1-2 Barcelona
Riyadh Air Metropolitano khelmuala mipui 67,710 pungkhawm hmaah mualneitu Madrid club hian chawlhlawk hma lawk minute 39-ah Giuliano Simeone-a goal hmangin hma an hruai zet a; goal hmahruai thuntu hi Atletico boss Diego fapa a ni nghe nghe.
Minute thum a kal leh tihah England forward Marcus Rashford chuan Atletico goalkeeper Juan Musso kapkara chhuihluytin Barca siphurh a sut a; first half tawp hma chiahin Lamine Yamal-a goal khung tur a dan dan dik lo avangin Atletico Madrid player Nico Gonzalez chu straight red card hmanga hnawhchhuah a ni.
Second half-ah a tam zawk ni chungin mikhual team-in bul tan mah se goal an khung belh thei mai lo a, hun pangngai tawp hma minute thum chiah awm tawhah veteran striker Robert Lewandowski chuan bench atanga khelmual lutin Catalan team chakna goal a khung leh hram a, a zawnin defending champion Barcelona hi La Liga match ruk an chak tling ta chiah a ni.
Team pahnih hi tun season-ah an intawng zing dawn tlauh tlauh khawp mai a, Copa del Rey semi-final khelh hnihah intumin, Atletico an chak tawh a, Inrinnia an insut leh kha season kal laia an vawi li insutna ni tawhin, Champions League quarter-final lamah tum hnih dang an inhmachhawn leh ang.
La Liga table-a hmahruaitu Barcelona tana phurawm em em chu inkhel danga an elpui lian ber ni mek Real Madrid an chak lo kha niin, chu mi chungchang chu broadcaster DAZN hnenah defender Eric Garcia chuan sawiin, “Vawiin tlaia thil thleng kha kan hre vek a, kan chak chuan title humhim kan tum mekna kawngah hmasawnna lian kan hmu dawn tih kan hria a,” tiin title race-a an dinhmun a sawi chhuak.
First half-ah khan team pahnihin goal thun theihna hun remchang an nei nual ve ve a, Atletico tana goal khung hnem ber ni mek Antoine Griezmann chu mikhual team tana hlauhawm siamchhuaktu langsar ber a ni leh a, goal em erawh a puitlin zo ta lo a ni.
Atletico Madrid hian point 57 hum chhunzawm chungin table-ah an hmun ngai palina an luah a, hmahruaitu Barca nena an inthlauhna chu point 19 zet ni tawhin, tualchhung league lamah ngam lo viau mah se Copa del Rey ang bawkin Champions League lamah phuba an ngaihven leh duh ngeiin a rinawm a, tunkar Nilaini zan hian Champions League quarter-final first leg khel turin Camp Nou an lut dawn a ni.
Barca boss Hansi Flick chuan Atletico muala inkhelh kha a boruak avang hrim hrim pawhin eng lai maha awlsam a ni ngai lo tih a sawi a, khati chunga point thum an hum haw thei lawmawm a tih thu hahipa sawiin, khati ang tak khan chak chaka tuihal huam huam reng an mamawh tih a sawi a, an title humhim tura an beih mekna kawngah game riat khelh tur an la neih thu leh chak zel an ngaih thuin a naute a fuih a, an game khelh leh tur lam chauha insawrbing tlat turin a chah.
Europe lama Atletico nen an insut leh tur chungchang tarlang telin, “Champions League chu a danglam hlauh tih kan hre vek a, player tinin tan kan lak lehzual a tul dawn a; tu pawhin semi-final thlen kan duh vek a, ni thum chhung inbuatsaihna hun kan neihah hian kan han chawl det ang a, kan game khelh leh tur lamah kan insawrbing leh nghal char char a ngai dawn a, tun ang game chiah chiah hi he hna ka chelh chhan a ni,” a ti.
Mallorca 2-1 Real Madrid
Mallorca Son Moix stadium-a mipui 23,015 lek chhuak khawm hmaah beisei loh tak main Spanish giants an tlawm a, a hniam pathum zinga bu liam lek lek reng Mallorca an la him chhunzawm ta zel rih!
Chawlhlawk hnaih tawh lam minute 41-ah Manu Morlanes chuan dinglam sir atanga Pablo Maffeo ball vawrh chu goal-ah chantirin, half time-ah si khat faiin mualneitu team-ah hma an hruai phawt.
Real tlawm hreh beilet tan minute hnih chiah awm tawhah Eder Militao chuan Trent Alexander-Arnold corner chhuih atangin mikhual si phurh sutna goal a thun hlauh a, point khat ve ve hmuin an inthathen ngei dawn niin a lang hman.
Hun pekbelh tir lamah Mallorca tan Vedat Muriqi chuan chakna goal a thun zui leh ta hlauh a; Kosovo forward tan season kal laia a league goal 19-na a ni der tawh a, La Liga scoring chart-ah pahnihna luah mekin, a phak loh awmchhun Real Madrid striker Kylian Mbappe lakah goal nga chiahin a hniam tawh!
Tarlan tawh angin, Real Madrid hian point sarih ngawtin La Liga leaders Barcelona an pha lo tawh a, Alvaro Arbeloa eam tan title race-ah beisei a chau zual sauh!
Real hian naktuk Thawhlehni Champions League quarter-final first leg-ah Bayern Munich an mikhual zui leh ang.
League khelh riat chiah awm tawhah hmahruaitu Barcelona-in point 76 an hum lain pahnihna Real Madrid-in point 69 an la pel zo lo a; May ni 10 khian Barcelona khawpuiah Spanish club ropui pahnih hi an insu leh dawn a, tah chuan Catalan-ho hian an title kawl lai an humhim fel hman tawh mai thei a, title changtu tur tichiangtu inkhel pawh a ni zawk mai thei a, la chiang lo ruai kara chiang awmchhun chu he El Clasico hi a nep thei lo tih a ni!
La Liga title race-ah Barca sang zel
