India leh China te chuan Line of Actual Control (LAC) chungchang chu Chushul a military commander te inbiakna neih hnuah a rang thei ang bera chinfel ni se an ti.
Inbiak tum 19-na chu August 13 leh 14 khan neih niin inbiakna hnuhnung ber neihah kha chuan ni khat bak an nei thei lo va. Tun tum erawh thuchhuah intawm pawh an siam thei thung.
New Delhi leh Beijing tena thuchhuah an siam hian a sawi tam lo thung a, ram pahnih te chuan Western sector LAC a harsatna awmte chinfel vat ni se an ti thung.
“Hruaitu tena guidance an siam milin ngaihdan tlang tak leh inhawng takin sawiho a ni” tiin thuchhuah chuan a tarlang a. “Harsatna la awm te a rang thei ang berin military leh diplomatic channel hmanga inbiakna neiha chinfel ni se. Tun dinhmunah chuan ram pahnihte chuan border area-ah boruak muanawm a awm theih nan hma la dun se” tih a ni bawk.
Tun tum inbiakna neihah hian India aiawhin Lt. Gen. Rashim Bali, General Officer Commanding (GOC) of the Leh-based 14 Corps chuan a hova, Corps Commander talks hnuhnung ber chu Chinese lamah April 23 khan neih a ni thung.
Corps Commander level a inbiakna hi 2020 khan tan a ni a, ram pahnihte chuan friction point panga – Galwan, North leh South Banks of Pangong Tso, Patrolling Points (PP) 15 leh 17A, Gogra-Hot Springs area atang te in inthiarfihlim ve ve tawh a ni a. Tuna inbiakna neih mek hi chu Depsang Plains leh Demchok atanga inlakchhuah chungchang niin China chuan kum 2020 intihbuaina hma dinhmun anga siam a ngiat a ni.
Tun inbiakna neih hi Prime Minister Narendra Modi leh Chinese President Xi Jinping te inbiakna neih tur hmahruai anga ngaih a ni a. Xi hian September 9 leh 10 a New Delhi a G20 summit a neih turah a tel dawna ngaih niin hei bakah hian ram pahnih hruaitute hi Johannesburg a BRICS summit August 22-24 a neih turah an tel ve ve tura ngaih a ni bawk.
Congress ten Modi sorkar bei
Congress te chuan August 16 khan Modi sorkar chu China nena ramri buai chungchangah beiin ‘Bharat Mata’ humhim turin tawngkam mai piah a thlen hun tur leh engtik nge ramriah status quoa ante humhim a nih ang a ti.
Media reports chungchang sawiin Congress general secretary Randeep Surjewala chuan, “19 round of talks China nena neih a hlawhchham leh a, tun hnai kum 3 chhunga inbiakna tin a la hlawhchham vek” tiin a sawi.
19th round of Corps Commander-level meeting neih hnua thuchhuah siamin “lawmawm lam, tha leh sawihona uluk taka neih” tia tarlan a ni a, mahse friction points te atanga sipai lakchhuahna lamah engmah inremna a awm lo thung an ti.
Surjewala chuan, “Status Quo Ante April 2020 chu kum thum leh thla thum chhung a ngai anga dahin a awm lo tawh” tiin a sawi.
“Indian Forces te chuan Depsang Plains a DBO Airstrip bul leh Demchok a CNN Junction bula petrolling points 65 awmah 26 ah engmah an tithei rih lo. Chinese te chuan India sipaite chu Y junction ‘Bottleneck’ tih kan ram chhungah ngei an la dang tlat a ni. Patrolling point 10, 1, 11A, 12 leh 13 te chu Chinese in an la dang tlat” tiin Congress leader Surjewala chuan a sawi bawk a.
Modi sorkar lakah zawhna siamain Surjewala chuan, “Eng hunah nge Indian territory ngei Chinese tena an luah mek chu rauhsan a nih ang a, Chinese Army te chu nawrlet an nih ang? Modi sorkar hian Chinese tena an luah mek Indian territory 1,000 square km chuang pek an remti ta em ni” tiin zawhna a siam a ni.
“Eng hunah nge Status Quo Ante April 2020 chu dinchantir a nih anga China hnenah ‘Red Eyes’ hmuh tir a nih ang? PM Modi hian 20th June, 2020 a All Party meeting neihnaa tute mahin India ram an lut lo a la ti reng nge, Ram dik lo takin thu a hrilh zawk” tiin Congress Rajya Sabha MP chuan a sawi bawk.
Surjewal chuan “Tutemahin Indian territory an lut lo a nih chuan eng vangin nge Chinese te nena inbiakna neih zui zel a nih, Army chief in Indian Territory dan kalhin an luah a tih hi a dik lo em ni? Modi sorkar hian ‘BHARAT MATA’ humhim turin enghunah nge tawngkam chauh piah lama chet a lak ang?” tiin zawhna a siam bawk.