Daily Newspaper

LADC-ah a vawikhat nan MNF hlangin sawrkarna siam dawn

7

Aizawl, December 9 : Kumin December 4-a Lai Autonomous District Council inthlanpui vawi 11-na neiha vote tlate chu December 8 khan Lawngtlaiah chhiar a ni a, bial awm zawng zawng 25-ah Mizo National Front ticket-a ding candidate 20-in hnehna changin a vawikhatna atan MNF sawrkar hlang a piang dawn.

Vote hi Lawngtlai DC Conference Hall No.2 leh BNRGSK Hall ah te chhiar niin, chawhnu dar 3:30 ah chhiar zawh a ni a. Bial 20-ah MNF candidate-te thlantlin niin, Bharatya Janata Party leh Indian National Congress ten bial khat ve ve an chang a, bial thumah independent candidate-te thlantlin an ni.

LADC term tawp taa chief executive member T. Zakunga chu BJP ticket-in a bial ngai Vawmbuk atangin thlan tlin a ni a; LADC sawrkar hnuhnung bera chairman V Zirsanga pawh MNF ticket-in a bial ngai Paithar atangin thlan tlin a ni. LADC-a Congress Legislature Party leader C. Sangchhunga chuan a bial Lawngtlai Bazar bial chu a hum zo lo a, deputy chairman LR Dingliana Chinzah chu a bial ngai Lawngtlai AOC-ah independent-a thlan tlin a ni.

Tun tum inthlanah hian inhnehna sang ber chu Tuithumhnar bialah niin, MNF ticket-a thlantlin H. Lalmuansanga chuan amah hnaih bertu BJP candidate JS Ushoi chu vote 552-in a khum a. Vote inthlauhna hniam ber chu Lungpher South bialah niin, INC candidate C. Lalmuanthanga chuan amah hnaih bertu MNF candidate C. Lalhnuna chu vote 61-in a hneh. 11th LADC-ah hian 10th LADC-a MDC mi 22 chu ding nawn lehin, mi 9 chu thlan nawn an ni a, MDC la ni ngai lo mi 12 thlan tlin an ni a, heng zinga 10 chu MNF candidate niin, INC candidate leh independent candidate pakhat ve ve an awm bawk.

LADC-a MNF sawrkar thara nihna chanvo chan dan tur chungchangah hian vawiin – December 9 hian Lawngtlaiah thutkhawm a ni dawn a. MNF Gen. Hqrs. atangin vice president Vanlalzawma bakah adviser, minister ni bawk Lalruatkima leh party hruaitu dangten Lawngtlai hi an thutchilh mek a ni.

The Aizawl Post zawhna chhangin MNF advisor Lalruatkima chuan, Council sawrkar din dan tur hi vawiinah an rel dawn a. Social media lama sawrkar in-form dan tur ni awm darh vak chu thu rintlak loh a ni tih a sawi. Seat an lak zat chu an beisei ang vel niin a sawi a, inthlana hlawhtlinna an chan avangin Lai ram mipuite hnenah MNF party chuan lawmthu a sawi tih a sawi a. Pu Zoramthanga kaihhruai sawrkarah rinna an nghat tih an hriatin an lawm hle tih a sawi. Inthlan buaipuitu State Election Commission, district election officer, returning officer leh inthlan kaihhnawiha an thawhpuite zawng zawng chungah an lawm tih a sawi bawk.

Thudawn danin, MNF ticket-a thlan tlin zingah hian Manghmung Chinzah chu party-a seniority-ah chief executive member tura awm ber a nih laiin, he dinhmun chelh tura iai deuhtu an awm nual nia sawi a ni a, inthlanpui hmasaa INC ticket-a thlan tlin, tunhnaia MNF-a inlet ta V Zirsanga chu duhtu an awm nual nia sawi a ni. Politic-ah leh District Council kaihhruainaa senior deuh zingah MNF party-a lut thar pahnih an awm avangin CEM-a dah nghal an nih a rinawm loh zawk nia sawi a ni bawk.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy