LADC Thlasik thutkhawm tan
Ni thum awh tur Lai Autonomous District Council Thlasik thutkhawm chu Thawhlehni khan LADC Session Hall Lawngtlaiah chairman VL Hmuaka kaihhruaia neih tan a ni.
Session hun hmasa lam chu MDC hlui, kumin July 2-a thi Thanglawma sunna hun atan hman a ni a. Hemi hnu hian tawngkaa zawhna awm chhan niin, eptu hruaitu K Hre Kung zawhna chhangtu CEM C Lalmuanthanga chuan state sawrkar angin LADC huamchhungah aikal lak khapna a hranin kalpui a ni loa, aikal lak hi phal loh sa a ni tih a sawi. Loh theih loh vangin thuneitute hriatpuina in aikal la an awm tih erawh sawrkarin a hriat thu a sawi.
LADC Thlasik thutkhawmah hian Thawhlehni khan sawrkar bill pahnih – The Lai Autonomous District Council (Salaries, Allowances & Pension of Member) (Fourth Amendment) Bill 2024 leh CAG Report for the Year 2016-2017, 2017-2018, 2018-2019 chu House-ah pharh a ni dawn a, bill hi House-ah sawiho a ni ang.
LADC Thlasik thutkhawmah hian House-a chhan tur zawhna 31 lutin, sawrkar bill pahnih a lut a; Private Member Resolution pakhat a lut bawk.
LADC Thlasik thutkhawm tan
