Lady Gaga ‘Just Dance’-in RIAA Diamond a kai
Lady Gaga hla tihchhuah hmasak ber ‘Just Dance’ chu Recording Industry Association of America (RIAA) certification-ah Diamond a kai tih RIAA chuan niminpiah khan an puang. RIAA Diamond kai tur chuan US-a 1,00,00,000 hralh tlin a ngai a ni.
Lady Gaga ‘Just Dance’ featuring Colby O’Donis hi 2008-a a tihchhuah kha niin, rimawi khawvelin Lady Gaga hming a hriat lar tanna a ni a, an tlangzarh atanga kum 15 hnuah RIAA chuan Diamond a kai thu hi an puang ta a ni. Gaga hla dang pahnih ‘Bad Romance’ leh ‘Poker face’ te chu RIAA Diamond certified an lo ni tawh bawk. Lady Gaga hi hmeichhe zaithiam zinga RIAA Digital Diamond Award dawng thei hmasa ber a ni bawk.
‘Just Dance’ hi Gaga album hmasa ber ‘The Fame’ atanga a lead single kha niin, he hla hi Billboard Hot 100 (singles) chart-ah No.1 a kai a, kar thum chhung a No.1 thei nghe nghe a, Lady Gaga hla he chart-a No.1 kai thei hmasa ber a ni. Gaga hian a hla dang ‘Poker Face’, ‘Born This Way’, Bradley Cooper nena an zai dunna ‘Shallow’ leh Ariana Grande nena an zai dunna ‘Rain on Me’ chu Billboard Hot 100-ah No.1 a kaipui tawh bawk a ni.
Gaga sawi takah chuan rimawi khawvelah a thawm a reh deuh laiin lemchan lamah a rawn inlan leh dawn hnai tawh a, a film channa ‘Joker: Folie à Deux’ pawh filming an zo fel deuh chiah e. He film hi Todd Phillips direct niin, Gaga hi Harley Quinn lemah a chang a, Joaquin Phoenix chu Joker lemah a chang leh a ni. He film hi 2019-a tlangzarh tawh ‘Joker’ chhunzawmna a ni.
Lady Gaga ‘Just Dance’-in RIAA Diamond a kai
![](https://theaizawlpost.org/wp-content/uploads/2023/04/lady.jpg)