Lady Gaga leh Bruno Mars ‘Die With a Smile’ a la Hot ber

Lady Gaga leh Bruno Mars ‘Die With a Smile’ a la Hot ber
Lady Gaga leh Bruno Mars te hla hit ‘Die With a Smile’ chu Billboard Hot 100 (singles) chart-ah a No.1 a, he chart-a kar thum a No.1-na a ni ta a, hetihrual hian Bad Bunny pawhin top 10-ah hla pathum neiin, ‘DtMF’ chu No.2-ah a debut bawk.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian kar khat chhunga all-genre US streaming (official audio leh official video), radio airplay leh sales data te chu tehna pawimawh a ni.
‘Die With a Smile’ hian kar khat chhungin radio airplay maktaduai 62, streaming maktaduai 29 leh sales 6,000 a la tling thei a, hei hi chart-ah a No.1 pui leh ta a ni.
Bruno Mars hi he chart-a hla hrang hrang hmanga a No.1 tawh zawng zawng belhkhawm chu kar 37 a tling ta a, he chart-ah No.1 nih reiah Michael Jackson nih rualin, pariatna a ni ta. He chart-a No.1 ni rei ber chu Mariah Carey niin, kar 97 a No.1 tling tawh a, Rihanna (60), The Beatles (59), Drake (56), Boyz II Men (50), Usher (47), Beyonce (46), Michael Jackson (37), Bruno Mars (37) leh Taylor Swift (36) ten an dawt.
Bad Bunny album thar ‘DeBÍ TiRAR MáS FOToS’ atangin hla pathum chart top 10-ah langin, ‘DtMF’ chu No.38 atangin No.2-ah a invawrh a, ‘BAILE INoLVIDABLE’ chu No.28 atangin No.3-ah invawrin, ‘NUEVA YoL’ chu No.27 atangin No.8-ah a invawrh bawk.
Bad Bunny hian he chart top 10-a lang thei hla 15 a nei tling ta a, Spanish hla chauh sa thin zingah he chart top 10-a lang thei hla ngah ber a ni a, English ni lo hla he chart top 10-a lanpui hnem ber a ni bawk.
Chart No.1 hlui Shaboozey ‘A Bar Song (Tipsy)’ chu No.2 atangin No.4-ah a tawlh a, ROSE leh Bruno Mars ‘APT.’ chu No.5-ah bawk la awmin, Kendrick Lamar leh SZA ‘Luther’ chu No.7 atangin No.6-ah a insawn a, Billie Eilish ‘Birds of a Feather’ chu No.3 atangin No.7-ah a tawlh ve thung.
Chart No.1 hlui Teddy Swims ‘Lose Control’ chu No.6 atangin No.9-ah a tawlh a, Gracie Abrams ‘That’s So True’ chu No.8 atangin No.10-ah a tawlh ta bawk.