LAFC hi ka first choice a ni lo – Son

ennis player tam zawkin tunMajor League Soccer (MLS) record fee thara Los Angeles FC (LAFC) zawm fel ta Tottenham Hotspur captain hlui Son Heung-min chuan American club chu a ‘first choice’ a nih loh thu sawi chungin club president nena an inbiak hnuah a rilru a thlak a, MLS lama kal a remti ta tih a sawi.
Los Angeles FC-in an leina man hi club pahnih leh player hian official-in tarchhuak lo mah se BBC Sport chuan a zirchiannaah pound maktaduai 20 chuang niin an chhut a; South Korean hian kum hnih daih contract a ziah bakah pawl pahnihin an remti tlang a nih chuan kum hnih dang LAs khawpuia cham zui turin contract thar an ziak leh thei ang.
Karliamta Inrinni daih tawh khan Son hian kum 10 zet a khawsak tawhna Tottenham a chhuahsan ve tawh tur thu a nemnghet a; tunkar Thawhlehni khan kum 33 mi hi a club thar LAFC-in Leagues Cup-a 2-1-a Mexican club Tigres UANL an hneh tumin stadium chhungah hmuh a ni zui nghe nghe.
A man zata BBC sawi hi a dik chuan Major League Soccer huang chhunga player man to ber a ni dawn a, kumin February thla maia Atlanta United-in Emmanuel Latte Lath mana Middlesbrough hnena pound maktaduai 16.5 an chhunluh kha khumin record fee thar a ni ang.
Tunkar Nilaini khan Son chuan a club thar press release kaltlangin thawm a rawn nei a:
“Dream come true a ni e. LA zet zawng khawpui namen a ni lo.
“Zep lohah chuan he club hi ka first choice a ni hauh lo a, mahse, season zawh hlima LAFC co-president John [Thorrington nen kan inbiakna khan ka rilru puthmang min thlaktir ta hlawk a, ka rilru, thinlung leh thluak min thlaksak vek a ni.
“He hmuna ka thlen chin tur lamin min hrilh a, tunah chuan he hmunah hian ka lo awm ta a, hlim tih piahlam ka ni a, ka phur takzet a ni,” a ti.
Son chuan sawizawmin, Los Angeles chu champion history nei thang tawh niin a sawi a, chu mi atanga bung thar kai tura puih ve chu a tihmakmawh a chunga tla nia sawiin, MLS-a chona thar chuan amahah phurna sang tak a thlen a, a club thar, a behchhan khawpui leh fans tana a engkim hlan tur leh LA tana trophy tam tak chawi ngei a tum ruh tlat thu a sawilang tel bawk.
Son-a club thar LAFC hi Western Conference table-a parukna luahtu ni mekin, a Tottenham team-mate ni thin Hugo Lloris nen khan pawl khat an ni leh ta a ni.
Pathianni liamta khan Son hian north London tana a game hnuhnungber chu South Korea khawpui Seoul-ah khelin, pre-season friendly-ah Tottenham leh Newcastle chu sikhat ve ve thunin an innehtawk.
Kum 2015 khan Son hian Bayer Leverkusen atangin Spurs a zawm a, a chhuah thleng khan game 454-ah goal 173 a thun tling.
Kumin May thla Europa League final-ah khan a captain-na hnuaiah Tottenham chuan Manchester United an hneh a, kha kha kum 17 chhunga Spurs trophy hlawhchhuah vawikhatna a ni nghe nghe!
Tottenham chairman Daniel Levy chuan an captain hlui thlahna thuchah sawiin, “Sonny hi Lilywhite shirt lar tak ha tawh zinga kan player neih ropui berte zinga pakhat niin, tunhnai kum 10 liamta chhunga a inkhel thlir kha hlimna min petu a ni.
“Footballer talent dawng chhah tak a ni satliah mai lo a, mihring mihrinna zawnah pawh club chhung leh khawvel huap pawha midangte thinlung khawih thei leh mite hneh thei khawpa pa ropui niin, khelmual chhung leh pawn lam thlengin club tan a thawhhlawk a, club tana a thilpek sawi hleih theih loh avang khan a chungah hian kan lawm reng tawh ang.
“A hmalam hun atan duhsakna tha ber kan hlan a, a lo kir leh hun hunah Spurs chhungkua chuan hmangaih leh duhsakna nen a loi kuangkuah dawn a ni,” tiin thlahna thuchah thlum mangkheng nen an fapa rangkachak a vailiam.