King Charles III, kum 74, chu May ni 6 khan Westminster Abbey, London-ah lallukhum khum tirin, a lal nihna nemngheh a ni ta a a nupui Camilla, kum 75, nen UK leh Commonwealth ram te tana king leh queen consort an ni ta. Queen consort hi lal nupui tihna a ni a, queen nen chuan a inang lo, queen chu lal nupui ni lovin, lalnu an ni thung.
Duke of Cornwell atanga Prince of Wales ni thin King Charles III hian Queen Elizabeth II thih hnuah September ni 8, 2022 khan lal thuthleng a rawn luah a, lal ni thei tura a hmasa bera awm a nih hnuah kum 70 leh ni 214 a nghak a, heti hian lal ni tura nghak rei ber record a siam ta a ni. King Charles hian mipa naupang kum 3 mi chauh a nih lai, a nu Queen Elizabeth II a lal tan, February ni 6, 1952 atangin lal a nih ve hun a nghak ta char char a ni.
A hmaa lal ni tura nghak rei ber Charles-a pu pu pu-leh Edward VII kha niin, ani hian kum 59 leh ni 73 chhung a nghal a, January ni 22, 1901 khan a nu Queen Victoria thih hnuah lal thutthleng a luah ve ta a ni.
Lal ni tura nemnghehna serh leh sang hi Archbishop of Canterbury-in a kawih a, Ampulla (mupui lem ang deuh rangkachak bawm) atanga hriak thianghlim chu Coronation Spoon a bun chhuakin, a kut zungtang pahnih hriakah chuan chiahin, lal thar hi a kut, a awm bawr leh a lu-ah hriak hi a thih ta a ni.
King Charles III hian a nu, Queen Elizabeth II pawhin a lo khum tawh, lal lukhum a khum ve ta a, he lal lukhum hi a man chhiar sen rual loh (priceless) ti a sawi thin a ni a, insurance pawh a tih theih loh. Mahse, 2019 khan CashNetUSA chuan he lal lukhum hlutna hi pound maktaduai 3.5 (Rs 36,15,43,000 vel) man niin an chhut. He lallukhum hi 22-carat rangkachak hmanga siam, lunghlu tak tak 444 a cheimawi a ni a. A rih zawng pawh kg 2.23 a ni.
Lal thutthlenga thu tura nghak rei ber King Charles III
![](https://theaizawlpost.org/wp-content/uploads/2023/05/king-1.jpg)