Laldenga thih cham pual hmang
MNF founder president, chief minister hlui Laldenga thih champha vawi 33-na denchhenin a thlan, Treasury Square Aizawlah Zirtawpni zing khan MNF party hruaituten hun an hmang.
1990 July 7-a thi Laldenga thlanah hian MNF president Zoramthanga, vice president – Vanlalzawma leh Lalthlengliana te, treasurer K Vanlalauva, MNF National Core Committee member, Biakdiki w/o Laldenga (L), minister/MLA, Aizawl deputy mayor/ corporator leh party hruaitu dangten zahna pangpar an dah a ni.
MNF president, chief minister Zoramthanga chuan Pu Laldenga ten kum 1961-a hnam thuthlung an tan a, movement an kalpui lai khan, hmalam hun a hmu chiang bik loa, tunah an ni pawh chu tho chu an ni a, chu rinna chu vawng tlatin Pu Laldenga pawh a thi a. An ni pawh chutiang chuan an thih ve a ngai, tiin a sawi.
“He ram min petu, he hnam siamtu leh min kaihruaitu hian a mipuite hi kan thluthlung angin Pathian tan a ni a, a dawtah kan ram tan. Chuvangin kan hnam movement hi Pathian tan a ni a. Chu thuthlung chu a rei tulh tulh a, a pawimawh tulh tulh a ni,” a ti.
MNF chuan Pathian zarah kum 62 chuang harsatna leh lungngaihna a lo hneh tawh a. Pathian tanpuina in, a duhzawng ti turin a hneh zel ang, tih rin tlat ngamnna chu an chakna a ni tih MNF hruaitu hian a sawi a. “He rinna kan vawn tlat hi kan felnaah ruat a ni. Pu Laldenga chi tuh chu rinnaa vuan tlattuah a lo tiak chho zel a ni,” a ti.
Zoram chu chhim leh hmar, chhak leh thlang atanga Zofate luhkhawmna tur, kan Jerusalem atana Pathian min siamsak a ni, tiin, “Hengte hi Pathian thiltum ropui tak tihhlawhtlinna tur a ni,” Zoramthanga hian a ti.
Laldenga thih cham pual hmang
