July 7 kha MNF founder president Laldenga thih champha vawi 34-na a ni a. Amah hriatrengna atan July 8 – Thawhtanni khan Aizawl Treasury Square-a a thlanah a chhungte leh MNF hruaituten zahna pangpar dahin inkhawm hman a ni.
Mizoram chief minister hlui ni bawk Laldenga thih champha hi kuminah Pathiannia a tlak avangin Thawhtanni khan hun hman a ni ta zawk a. MNF president Pu Zoramthanga chuan Pathianin Pu Laldenga min pe chu Mizote kan vanneihna lungphum pawimawh ber zing ami a ni, tiin, India ram mai ni lo, khawvela Mizo hnam min pholangtu a ni tih a sawi.
“Khatih hunlaia Zofate mai ni loin, thangthar zelte thinlungah thleng pawh hnam thinlung a tuh a. Sawisela ngaihnep tum awm thin mah se, kan finna a sang tulh tulh a, Pu Denga hlutna hi kan hrechiang chho tulh tulh a ti. Mizo hnam leh Mizoram a awm chhung chu Pu Laldenga hming a dai tawh dawn lo tih a sawi a ni.
Tun dinhmuna kiltin – Burma, Bangladesh, Manipura buaina thleng leh Tripura-a bul intan meka kan unaute buaina thleng karah Pu Denga’n remnaa min lo hruailut ta ropuina leh finna a tilang zel a, kawng tinrengah hma min hruaisak hlawkna a lang zel tih Zoramthanga hian a sawi. “Amah hriatreng nan hun kan hmang hian a hoa remna kan neih hlutzia a tarlang a. A changa remna sawineptu emaw a changa sawimawitute emaw karah Pu Laldenga hoa remna kan neih hlutzia hi a a lang zel a, Mizoten kan a ni kan nei hi kan vanneih zia pholan a ni zel dawn a ni,” a ti.
Laldenga fanu Dr Renee Rinzuali chuan ‘Pathian leh kan ram tan’ tih thu an ngaihtuah chhuah dan a pa hnena zawh a chak thu sawiin, Sikkim mi pakhatin a fanu a ni tih hre loa, a hnena Laldenga kan lo nei bik vannei min tih thu a hrilh tih a sawi. “Keini’n kan ngaihtlut chu thuhran, hmarchhak mi tamtak hian a ni kan lo nei hi vannei min ti hle a ni,” a ti. A pa hnung zuia ram leh hnam tana hma latute theihtawpa thlawp zel an tum tih a sawi a ni.
Laldenga thih chamah a thlanah hriatrengna hlan
