Daily Newspaper

LALDENGA THUSAWI PAWIMAWHTE

55

Isaac Zoliana
Mission Veng

(A thih kum 30-na, July ni 7-ah hian Laldenga i hre thar leh ang u)

1. Pathianin Mizoram hi kan chenna atan min pein, ramri-te min khamsak a. Kan ramah hian hnam dang kan laltir chuan Pathian Dan kan bawhchhia a ni.

2. Mizote hi Pathianin Mizoram vaivutin min siam a, Mizoram vaivutin min chawm lian a. Kan ram-ah hian tumah kan laltir a thiang lo. Mizoram vaivutah hian kan kir leh dawn a ni.

3. Pathianin Mizo Hnam hi duh tak leh hmangaih taka a siam a ni. Zoram ngei hi kan chenna atan leh kan intunnunna tura a thilthlawn pek kan dawn chu a ni a. Chuvangin kan ram hi Pathian laka kan chanvo ropui ber pakhat a ni tih i hre nawn leh theuh vang u. He kan Hnam rochan Zoram hi enkawl a, tihmasawn hi min petu kan Pathian laka kan mawhphurhna a ni. He mawhphurhna atang hian tumah kan fihlim lo tih pawh kan hre reng tur a ni.

4. Hnama min siam a, ram min petu chuan, kan mamawh zawng zawngte leh kan harsatna tur zawng zawngte pawh a hre lawk vek a ni.

5. Zofate intunnunna tur hausakna pawh he ramah hian a phum telin, kan Hnam a boral lohna tur pawhin kan thinlungah finna leh huaisenna min pe tel a ni.

6. Ram leh Hnam hi boral leh mai turin Pathianin a siam lo. Amaherawhchu, a thil siamziate kan rinhlelh chuan kan boral ang; Amah ringhleltu Hnam tam tak an boral tawh ang hian.

7. Min siamtu kan Pathiana innghat tlatin, Hnam dingchhuak tura a siam kan ni tih ring tlatin, kan ram leh Hnam hi i enkawl ang u.

8. Nunna pasarih pawh nei ila, Kan ram leh Hnam tan ka hmang vek ang.

9. |hangtharte thinlungah ram leh hnam hmangaihna chi nung a lopiang tih ka hmu a. Naktuka kan ram min hruai a, ro min relsaktu turte thinlunga ‘ Hnam Chi Nung’ a lo piang hi a lawmawm a ni.

10. Hnam chawimawi tura ruh tliak rem rum damdawi ina zawn luh ngai khawpa tuartute hi fak loh theih an ni lo.

11. Ka in kang thelh nan chuan tui nu leh tui fim ka sawi lovang. Ka hmuh apiang ka hmang ang.

12. Rinhlelhna hi Setana hmanraw ropui ber a ni a. Kan Thlarau leh kan taksa leh kan ram tan pawh boralna kawnga min hruaitu a ni.

13. Keini Zofate, hnam tlemte hian rahbi tha kan rah a, lei rema kan ke kan nghah hmasak loh chuan, India mipui maktaduai tam takte zingah hian tel thei rual kan ni lo

14. He Remna thuthlung hi Mizote chanvo tur, a rah kan seng tur a ni lo va. A bul kan tanna tur a ni tih in hriat chian ka duh ngawt mai. He remna thuthlung atang hian lei rem rapin, keini Mizoram mipuite hian kan ram ro kan rel ang a. Chu mi hnuah chuan kan hma lam kan pan dawn a ni. Chuvangin he thuthlung hi rahbi hmasa ber a ni chauhva ni. Kan kal zel ang.

15. Lo hawn chakna em em pakhat kan nei a. Kan lunglen thu chu thu hnunhnungah awm sela. Kan thangbo hlan hian, tehkhin rual loh, kan hriatthiamna turin, Arona hovin bawngno lem an chhung ang tih kan hlau ta a ni.

16. Hna hmasa kan neih tur chu Social Reform a ni. Mi hausate chibai buk lovin, mi hausate hnenah tawngtaina hlan lovin, mipuite hi neitu kan nih a hun ta a ni.

17. Mizoram tharah chuan Sawrkar chu kan chhiahhlawh, mipuite rawng bawl turin a ni kan dah dawn.

18. Martarte, kan pasalthate thisen avangin, Mizoram chu zahawmah a awm ta a ni.

19. He Hnam hi zahawma a awm theihna turin, a din chhuahna turin, Pathianin Mizovah min siam a ni, tih hi vawi khat mah i theihnghilh suh ang u.

20. Pathianin Mizova min siam hi lawmthu sawiin, i keng zel ang u. Hei hi i theihnghilh lo vang u. Mahni nihna hmusittute hi mi zahawm lo ber an ni.

21. Kan thangbo hlana in hri vei pakhat chu – mahni inrintawklohna hri in vei a ni. Mahni inrintawklohna hi hlawhchhamna hringtu a ni. Hlawhtlinna a tichhe vek thei. Thil tithei lova inngai thil tithei an awm ngai lo. Chuvangin he hnam hian thil a ti thei a, amahnin a ding thei a ni tih i hre theuh vang u.

22. Mihring awmdan reng reng hi mahni a inngaihdan angin a khawsa ber a. Amah a inngaih angin mi dangte pawhin ngaihdan an siam chhuak ve.
23. Ram buaina azara hlawkna hmutute hian buaina a kian an hlauvin, mipui an tibuai thin reng a ni.

24. Mi tinin Dan bawhchhe lova hlimna kawng a zawn hi a thiang a ni.

25. Social Reformation ka sawi apiang hian zuk leh hmuamah hian min tlakluhpui thin a, a dik thawkhat a ni. Ka hmuh dan chuan zuk leh hmuam hi a hnuk a ni lo va, a zungtang a ni.

26. Kan fate kan hmangaih a nih chuan kan kawm ngeih tur a ni.

27. Party dang anga le lo taka mipui zirtir ve thei kan ni lova, kan duh duh sawi ve thiang pawh kan ni hek lo.

28. Bumhmang sawrkar hruaitute lakah kan ram kan ven hi kan tihtur leh kan bat a ni.

29. Mi dangin eng nge an zirtir che u? “Hawh u, he ram hi hluihlawn mai ula, rangva ka pe ang che u, kan pawlah lokal ula, IRDP ka pe ang che u, “ tih hi Israel fate politics a ni lo.

30. Pathianin ram min pe a, i siam hausa ang u le. Kan nupui fanaute nena kan ro atan min pek hi, a tul chuan i veng ang u. A tul anih chuan kan tlangvalte thisen paw’n kan veng mai tur a ni.

31. Vawiinah hian huaisen taka ka sawi duh chu – kan ram tan hian kan nung a, kan thi a ni tih hi.

32. Leilungah kan mamawh zawng zawng , kan thlarau mamawh ni lo, kan taksa mamawh hi politics atang lo chuan a hmuh theih si lo va. Chu mi rual rual chuan kan politics chu tenawmah kan chantir tawh si a.

33. Party thenkhat chuan an policy-ah min hmang ta a. Min sawichhiat hi an tuina ber emaw ni chu aw, tih khawpin thu an lek ta a ni.

34. Pathianin hnam a din hian tundin a tum bawk a ni. Mi rahbeh atan hnam a din lo.

35. Kan hnam a siam hian mite tihduhdah atan emaw, an kutthak hnawh nan emaw, Mizo hnam hi a din lo. Pathianin duh taka a siam, a chi thlahte, a kohte kan nih hi kan ring tlat a ni.

36. Fakna chu thlan chungah aw

37. Silaia kah aiin Nationalism a hlauhawm zawk.

38. Thuneihna hi hausakna ni.

39. Silaia kah aiin chimral a hlauhawm zawk.

40. “Ka phalna lo chuan Mizoramah i lo lut thei lo,” Rajiv Gandhi phone-in a hrilh.

41. “Prime Minister ka ni a, India ram khawiah pawh ka kal thei,” Laldenga phone-in a rawn hrilh.

42. “ Mizoramah lo kal thei lo turin Inremna-ah khan i inziah pin tawh kha” Laldenga’n Phone-in Prime Minister a hrilh.

43. Mizoram chu India atangin ka lak chhuah fel vek tawh kha |hangtharte kan inremna hi an la zir chiang ang a, an la hre chhuak vek ang. Mahse, sawi ve hlek suh u, an man mai ang che u.

44. Naupan laia kan kawr hak chu puitlin hnu chuan kan ha thei tawh lo.

45. Politics ah Full Stop a awm lo.

46. Mizo Hnam, Mizo Nation tundin tumte avangin a ni khawvelin min hriat a ni

47. Mizote hian India bawiha awm hi kan tlin lo vang.

48. Mizoram hi Mizo ta a ni si a.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy