Daily Newspaper

LALPA’N THIL ROPUI MIN TIHSAK

23

Lalrinpuii

July 26, 2021 (Thawhtanni) khan pangngai taka hun kan hman lai leh ramri lama kan sipaite ngei pawh muanga an awm laiin Vairengte thlang lawka Auto Stand-ah chuan Assam Police te chu chawhma lamah mi 200 rual vel rawn chhovin DC leh IGP hovin an rawn thawk chho va, an rawn thawkrip nghal hle mai a, Puan In kaih tur mai bakah Ambulance te nen an rawn thawk chho rup mai a ni. Auto Rickshow stand an rawn pel chho va, hei hi lo hmuin Vairengte mipui an lo inpunkhawm nghal a, tlangau an au nghal bawk a ni. A theih dan dan angin mipui lamin Assam Police te chu an lo dangin an lo hmachhawn a, rei vak lo chu an innawr hman a ni awm a, mipui lam atangin hliamte an awm hial a, amaherawhchu, Assam lam hi hnungtawlhin an Puan In kaih turte leh an motor te chu tlansanin Vairengte mipuite hian an nawr thla zel a, Mizoram lamin IR awmna tura an sak mek, la sak zawh famkim lohna hmunah chuan Assam Police te hi awmin bu an khuar ta tlat mai a.

Heta tang hian mipui hlauh atan tear gas te an rawn kap zauh zauh a, chutih lai mek chuan he Assam lam awmna buk kawtah hian Kolasib SP leh Assam lam sipai hotute hi an inbe mek bawk a. Boruak daih zawkna atan tawlh kir turin an inti ve ve a, tawlhkir chu harsa an ti ve ve bawk a ni awm e. Chutia tawlhkir an tum loh ve ve avang chuan nge ni Assam lam chuan thal an rawn thlah ta mai a, Kolasib SP te tan ngei pawh dinhmun hlauhawmah an awm tih inhriain an sahimna atan an insaseng nghal a. He Assam sipaite tawmna In hi kawngpui bul lawk ruama awm niin a bul lawk tlang atangin kan sipaite chuan hmun thum lai atangin silai nen inring takin an hual bet reng bawk a ni. Tichuan silai a puak chhunzawm ta zelin minute 45 lai an inkap hman a, Assam lam hian flag var an rawn zar tak avangin inkahna hi a tawp ta a ni. He inkahnaah hian Assam lam 6 boralin mi 50 vel hliam an awm a, keini lamah boral awm lovin hliam hi pakhat awmin a malpuiah kah a ni.

He ramri buai avanga inkahna lo thleng ta hi a pawi hle mai a, Assam lamin nunna chan an awm hi a pawi bawk nain an cho chhuah nia hriatna a awm. Kan sipaite hian kah hi an châkin an cho em em a, nimahsela, a tir lamah hotu lam atangin thupek an hmuh mai si loh avangin an insum hram hram zawk a ni. He inkahna hi a Pathian thu riauva hriatna keimahah a awm a, Thuthlung Hlui huna Pathianin a mite a lo hruai tawh dante kan chhiar fo vang a, vawi tam tak hmelma beiin an awm a, mipuite ngei pawh hmelma beiin an awm fo a nih kha. Hmanraw tha leh rintlak an neih loh chang pawhin chung lam puihna azarah hnehna an chang thei zel mai thin kha a ropui a, chutiang chiah maiin tunah Assam leh Mizoram sipaite inkahnaah ngei pawh keini lam chuan ralthuam emaw chauh kan neih laiin Assam lam chuan Ambulance te leh Puan In kaih turte nen hial rip takin an rawn thawk a nih hi. Nimahsela, hnehna chu Lalpa ta a ni si a.

Assam Chief Minister Himanta Biswa Sarma ngei pawh hi mi chapo tak leh fing tak a ni a, social media lam hmang thiam tak mi a ni bawk. Kristiante nekchepna ang hiala kan ngaih leh ngaimawh CAB chungchangah ngei pawh khan North East India-ah chuan amah hi pass-tir tuma hma la nasa berte zinga mi a ni a, a tawpah December 4, 2019-ah pass a lo ni ta nghe nghe a nih kha. Amah Himanta Biswa hi kumin May 10 atang chauhva Chief Minister thutthlenga thu a ni a, boruak siam len a tumna hmanrua atan heti hian ramri lamah harsatna a rawn siam ni ngeiin chinchang hriate chuan an sawi nghe nghe. Chutiang khawpa Pathian mite tana nekchepna hmanraw pawimawh tak leh Hindu sakhaw vulh lenna atana hma latu langsar tak a nih avangin leh India hmarchhaka BJP boruak tlachhe mek chawhthawh leh an tumna atana an hmanraw pawimawh ber a nih avang hian chunglamin a chapona tlangsang tak ata a hnuhhniam ve hun atan ramria inkahna hi a thlentir a ni maithei a ni. Pathian mite nekchep tuma beitute hi Bible-ah pawh an chan a chhiat zel zawkzia kan hmu a, a hun takah Pathianin a kut a thawh thin a ni.

Kristian kan nihna hi he khawvelah hian kan lantir fo a pawimawh a, kan nun danahte, kan khawsakna hmun hrang hrangah ngei pawh Kristian kan nihna hi kan lantir fo a pawimawh a ni. Ram leh hnam tan pen chhuakin ram hruaitu hial pawh ni ila, chu hmunah chuan kan Kristianna kan lantir chuan si loh chuan chawimawi kan ni tak tak ngai chuang lo vang. Lalpa’n thil ropui tak min tihsak theihna atan a hnena kan tluk luh fo a ngai a, a kuta nitin kan inhlan pawh a pawimawh a ni. Chumi chu an hriat avangin khawvel ram ropui bera chhal ngam America te chuan an pawisa tlang zawng zawngah ‘In God, We Trust’ tiin an ziak lang vek a, Pathian ringtu an nihna hi an thiltihna kawng hrang hrangah an lantir bawk thin a ni. Hei vang hian vawiin thlengin hnam ropui leh chhuanawm an la ni reng thei a, khawvel ram dangte hian an la lehpel thei ngai lo reng reng a ni. Keini hnam tlemte ngei pawh hian Pathiana rinna kan nghah tlat a, ram hruaitu atanga mi tê ber thleng pawha rinna nghet tak kan neih tlat chuan chunglamin kan chhehvel hnamte aia ropuiin min la chawisang thei tih hi i theihnghilh lo ila, a chet ve theihna turin a tan leh a ropui zia lantira a awm theihna atan hun leh hmun i siam fo thin ang u.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy