Lammual chhehvela thing kih chungchang thu kalzelah May 18 khan Gauhati High Court-ah Mizoram sawrkar ukil Biswajit Deb chu court-in a hriat duh sawiin a inlan.
Sawrkar ukil sawi danin, Lammual chhehvela a tira thing kih tura chhinchhiah 170 zingah dan anga phalna lak ngai chu 107 a ni a, chu’ng zinga 53 chu hum theih a ni. Thingkung 44 an lo kih tawh avangin 10 vel chauh kih belh mamawh a ni tawh tih a sawi.
Chutihrualin sawrkar chuan 23 kih belh ngai a la ti thung a. High Court hian thing kih aia a tiak phun tur thing hming leh phunna hmun tur bakah thing kih len zawng leh an thing kih tihral tum dan ziaka thehlut turin a hriattir.
Hemi chungchangah hian environmental group – Centre for Environment & Social Justice chuan, Lammual chhehvela thing kih hi a hmuna enpuitu pawh awm loa hmatiama kittute kha CESJ-in lo dang lo se chuan, Mizoram sawrkar ukil-in hum theih nia a sawi nen lam hian an hun tiam chhung khan an kit fai vek ngei a rinawm tih a sawi a ni. CESJ chuan development a do lo a, tul lo thleng thlenga environment tih chhiat a do mai zawk tih a sawi a ni.
Hemi chungchang hi May 26-ah Gauhati High Court hian a ngaihtuah chhunzawm leh dawn tih sawi a ni.
Lammual chhehvelah sawrkarin kih loha hum theih thing 53 chhinchhiah
