Lammualah Winter Festival tan
Ni ruk awh tur Winter Festival chu Thawhtanni zan khan Aizawl Lammualah neih tan a ni a, Tourism minister Lalnghinglova Hmar chuan a hawng.
Tourism minister chuan Festival chu Mizo mipui leh thalaite hlim leh thianghlim taka an inhmuhkhawmna tur, khualzin hip theihna tur, keimahni kan intihphur tawn a, kan ei leh in siam kan kutchhuak leh kan thil neih kan hralh theihna hun remchang a ni, tiin a sawi a. Heng bakah hian kan ram mawina, tlang, lui, ruam kan boruak thianghlim, state dang mite leh khawvel hmun dang amiten an hmuha an chhim ve theihna tura buahsaih a ni tih a sawi bawk.
Festival hi December 20 thleng hman phawt a ni anga, December 23-ah ‘Christmas Parade’ neiin, Chanmari kawn atanga tan tur a ni a, Krismas lam hawi thuam inbel tur a nih bakah Lammual leh a chhehvel pawh chuti ang hawia cheimawi a ni ang. Lammualah Christmas Carol-a chhunzawm tur a ni.
“Christmas parade chu kuminah keimahniin kan kal phawt anga, nakumah hnamdangin min rawn zawm ve anga, tun atanga kum 5-10 ah chuan, India ram state dang mai ni lo, khawvel hmun dang atanga an pan khawm tura buatsaih kan duh a, chutiang tur chuan hma kan la tan dawn a ni,” a ti.
Lammualah Winter Festival tan
