Daily Newspaper

Lampard thlaktu tur an melh

8

Nipui bazar liam taa sum seng hnem Chelsea an khel tha tluang thei lova, beisei anga an chetthat theih loh vangin manager Frank Lampard dinhmun a derthawng tan. Daily Sport chuan Chelsea in Lampard thlaktu tur an melh tan niin a tarlang a. Lampard thlaktu tura hming sawi rikte chu manager hriat hlawh tak tak Thomas Tuchel, Max Allegri, Brendan Rodgers leh Ralph Hasenhuttl te an ni.

Chelsea player ropui ni thin Frank Lampard hian a club hlui Chelsea a enkawl tirh lamin a chetthatpui hle a, khelh 17 chhung zet tlawm nei lovin a kaltluanpui nghal mai a, season tawpah top 4 huang luah in, champions league khel turin a tlinpui hial bawk. 2020 nipui bazarah a duh zawng player a la khawm a, sum pawh an seng hnem hle a, EPL club zinga sum seng hnem ber an ni. Player paruk; Timo Werner (RB Leipzig), Kai Havertz (Bayer Leverkusen), Hakim Ziyech (Ajax), Malang Sarr (Nice), Ben Chilwell (Leicester), Thiago Silva (PSG) leh Edouard Mendy (Rennes) te an la lut a, an sum sen zawng zawng hi €247.2 million ($292.4 million) zet a tling. Heti chung hian season tharah bul an tan tha thei lo. Chet that chang nei in, beisei a sang ve deuh thin nanga tunhnaiah an chet chhiat leh tak vangin Lampard-a dinhmun hi a derthawng thar leh ta a ni.

London club lian Chelsea hi Premier League an khelh hnuhnung vawi rukah vawikhat chauh an chak a, EPKL-ah vcawi 17 khel tawhin point 26 an hmu mek a, pakuana an ni. An khelh leh hunah an chak zo lo a nih chuan an tlahniam duai thei dawn hial bawk. Hmahruaitu Liverpool aiin point 7 in an hniam zawk mek a, hma an sawn theih loh em vang hian Lampard hi ban a, manager rawih mai an rilruk tan ta niin tarlan a ni. Hetihlai hian Lampard hi hun tam zawk pek a, enthlak leh rih an duh niin tarlan a awm bawk a, vawikhat chak leh tlawmin a hma lam hun a hril thui thei dawn ta viau niin a lang.

Chelsea manager thar ni thei tura hming sawirikte hi an hrawl hreihhrawih hle a, manager hriathlawh tak tak a ni. Tunhnai maia PSG in an ban tak Thomas Tuchel hi Borussia Dortmund leh PSG-a hmingchher tak, EPL club leh ram dang club liante pawhin an manager ni tura an awh rawn a ni. 201-ah Juventus a chhuahsan hnua team la enkawl leh rih lo Massimiliano Allegri hi Premier League club lian hrang hrang leh Italian Serie A club lian dangte pawhin an ngaihven rawn a ni. Premier League-a manager ni mek Brendan Rodgers leh Ralph Hasenhuttl te pawh hi manager tha tak an ni bawk. Hming an lamrik pali zinga hriat hlawh lo deuh ber Ralph Hasenhuttl hian team vangtlang Southampton a chetthatpui hle a, thawhtan zan khan champion lai Liverpool an hneh nghe nghe. Saints hian khelh 17 atanga point 29 hmuin parukna an luah mek a, hmahruaitu Liverpool nen an inkarah point li lek a tlazep. Heti khawpa Southampton a chetthatpui vang hian manager duh rawn a nih phah ta hial a ni.

Tarlan tawh angin Chelsea a Lampard hma lam hun hi a chiang lo hle. Vawikhat chak loh vangin ban a tawk thut thei a, vawikhat chak vangin ban a pumpelh hlauh thei bawk. Lampard hi an ban a nih chuan heng manager pali zina tuemaw ber hi Chelsea manager thar ni ngei tura ngaih an ni thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy