Larsap atan Gen. (Dr) VK Singh lalut

General (Dr) Vijay Kumar Singh (Retd) chu Mizoram larsap 25-na ni turin Ningani khan Raj Bhavan Circular Lawn-ah rinawmna thu tiamtira lakluh a ni.
Gauhati High Court chief justice Justice Vijay Bishnoi chuan rinawmna thu tiamtirin larsap atan a lalut a. Chief secretary Khilli Ram Meena chuan President of India-in larsap atana a ruatna a chhiar chhuak a ni.
Larsap lakluhnaah hian chief minister Lalduhoma, chief minister hlui pahnih – Lal Thanhawla leh Zoramthanga, Assembly speaker Lalbiakzama, Home minister K Sapdanga, leader of opposition Lalchhandama Ralte, cabinet minister-te, Gauhati High Court judge, deputy speaker, minister of state-te, Lok Sabha MP, Rajya Sabha MP, MLA-te, DGP, political party leh NGO hruaitute bakah sawm bik mi pawimawhte an tel.
General (Dr) Vijay Kumar Singh (Retd) hi 1951 May 10 khan Pune-ah a piang a. A nupui Bharti Singh nen fanu 2 leh tu 1 an nei. Birla Public School Pilani leh National Defence Academy-ah lehkha zirin, sipaia a luh hnuah Indian Army Chief of the Army Staff 26-na dinhmun a chelh tawh a ni.
General Singh hi 1970 June 14 khan 2nd Battalion of The Rajput Regiment (Kali Chindi) ah commission a ni a. Defence Services Staff College Wellington atanga honour graduate niin, US Army Rangers Course at Fort Benning USA leh USA Army War College, Carlisle Pennsylvania atanga graduate a ni bawk.
Sri Lanka-a IPFK kaihhnawih operation avangin Yudh Seva Medal (YSM) hlan a ni a, kum 2005-a counter insurency force hlawhtling tak a kaihhruai avangin Ati Vishisht Seva Medal (AVSM) hlan niin, kum 2009-a Eastern Theatre-a hna tha leh chhinchhiah tlak bik a thawh avangin Para Vishisht Seva Medal (PVSM) hlan a ni. 2010 March 31 khan Chief of the Army Staff dinhmun luah tanin, 2012 May 31 khan a chawl a ni.
2011 March 11 khan United States War College (Class of 2001) International Fellows Hall of Fame 33-na atan lakluh a ni a; Indian Armed Forces officer zinga lakluh hmasak ber a ni.
2014 March 1 khan Bhartiya Janta Party zawmin, hemi kum Lok Sabha inthlanpuiah Ghaziabad constituency atangin a tling a, India rama inhnehna sang berin a chak a ni. MoS for External Affairs, MoS independent charge for DoNER leh MoS for Overseas Indian Affairs mawhphurhna a chelh a. MoS MEA a nih laiin ramdang nena inbiakna pawimawh hrang hranga a tel thin bakah Asia, Africa, Latin America & Caribbean leh Europe-ah hna pawimawh bik thawk tura ruat thin a ni.
Yemen leh Sudan ram buai, civil war laia mi 7000 chuang chhanchhuah kawngah leh ISIS-ten Iraq-a India mi an rukbo leh thahzuite ruang 39 India rama lakkir kawnga hmalaknaah a hmingtha hle a. Ghaziabad atang vek hian kum 2019 Parliamentary election chuh lehin a chak a, MoS Road Transport & Highways dinhmun chelhin June 2021 khan MoS Civil Aviation mawhphurhna pek belh a ni.
Russia leh Ukraine buaina avanga India khua leh tui zirlai 18000 dawn Ukraine-a tangkhang la chhuak tura Operation Ganga kalpui a nih khan General VK Singh hi Poland atanga chhanchhuah hna kalpui turin sawrkar laipuiin a tir a, zirlai 4000 dawnte chhanchhuah leh thawnhaw hna hlawhtling takin a thawk a ni.
Kum 2003 khan Silkyara Uttarakhand-a tunnel siam mek chim avanga hnathawktu 41an tan tum khan MoRTH hnuaiah General (Dr) VK Singh (Retd) chu chhanchhuah hna buaipui tura tirh niin, ni 16 chhung cham chilhin hnathawktu 41-te him dam taka chhanchhuah an ni.