Larsap-in Education hotute kawm Mizoramah school 4418 awm mek

Larsap-in Education hotute kawm
Mizoramah school 4418 awm mek
Larsap Gen. Vijay Kumar Singh (Retd) chuan School Education department hotute chu an secretary David Lalthantluanga hoin Ningani khan Raj Bhavan-ah a kawm a. Sawrkar laipui scheme hrang hrang kalpui dan, state education dinhmun, department hmalakna leh hmachhawp tlangpui a sawipui.
Sawrkar scheme pawimawh leh National Education Policy 2020 tha taka kalpui a tul tih larsap hian a sawi a. Sawrkar laipuiin zirna tihhmasawnnan sum leh pai tam tak a seng a, Mizoramah school tha tak tak a din tih sawiin, Mizo mipui chu Eklavya Model Residencial School, Kendriya Vidyalaya, Sainik School leh Jawahar Navodaya Vidyalaya chhawr tangkai tum turin a chah.
School Education secretary sawi danin, zirlaibu chhung lesson tin hmaih awm loa zir kim vek a nih theihnan ‘lesson plan’ an siam a, school thlan bik class 3, 6 leh 9 ah ‘common question’ ruahman a ni. Zirlaiten chiang zawka an zirlai an thiam bel theihnan contextualization of textbook kalpui a ni a, bilingual textbook siam a ni. Zirna tihhmasawn leh zirtirtu indaihlohna phuhruk kawngah sawrkarin theihtawp chhuaha hma a lak zel thu a sawi bawk.
School Education director Angela Zothanpuii’n PM Poshan- Mid Day Meal kalpui dan a sawifiah a. State project director C Lalthanzira’n Samagra Shiksha chungchanga pawimawh a sawifiah a ni.
Zirna tihhmasawnna atana central scheme kalpui dan, education curriculum duan leh bawhzui dan, NEP 2020 kalpui dan, sawrkar laipui school tha tak tak Mizorama awmte Mizoten kan hmelhriat chian lehzual a, tangkai zawka kan chhawr theih dan tur bakah zirna tihhmasawnnana pawimawh dang sawiho a ni.
Report danin, tunah Mizoramah school 4418 a awm mek a; state sawrkar enkawl school 2573, deficit school 26, govt. aided school 340 leh private school 1479 a ni. PM SHRI School 35 awm mekin, zirlai nuai 3 dawn an awm.