Larsap-in Mizoram dinhmun sawipui
Ningani khan larsap Hari Babu Kambhampati-a’n Raj Bhavan-ah L Hangsing, Principal Accountant General leh a thawhpuite a kawm a, Mizoram sum dinhmun an sawi.
He hunah hian State Finances Audit Report(SFAR) 2021-2022 chungchanga larsap-in a hriat duh te an inhrilhfiah a, an sawiho bawk. PAG hi Deputy AG Elvina Lalmuanpuii Leivon leh official dang te’n an tawiawm a ni.
Larsap chuan PAG leh a thawhpuite chu SFAR 2021-22 an siam takah a hriat chian duh laite zawtin a sawipui a, audit lam thlirna atanga Mizoram sorkar dinhmun dik tak leh hmabakte pawh larsap hian a zawt a ni. Public Account Committee (PAC) leh PAG office thawhhona chungchang pawh a zawt bawk.
SFAR 2021-2022 hi Assembly-ah pharh a ni tawh a ni. SFAR hi Audit ten India Danpui hnuaia Article 151 behchhan a, kum khat chhunga state sum dinhmun – lakluh, thawhchhuah leh hmanna bakah hman dan zirchianna kimchang, a buatsaih a ni.
SFAR-in a tum ber chu sum leh pai state dinhmun dik tak tarlan, kum tam tak chhung atana state sum leh pai uluk taka vawn dan inkawhhmuhna, state sum thawh chhuah, lakluh leh hman dan te dan ang thlapin zawm a ni em ti enfiah, account leh finance report dik tak a awm theih na tura sorkar tanpui leh tih dan dik kawhhmuh te a ni.
Larsap-in Mizoram dinhmun sawipui
![](https://theaizawlpost.org/wp-content/uploads/tap_logo-min-large.jpg)