National Highways & Infrastructure Development Corporation Ltd (NHIDCL) in Mizorama project hrang hrang – kawngpui siam hna leh hna dang a thawh mek thlir puiin Thawhtanni khan larsap Hari Babu Kambhampati chuan NHIDCL executive director Virender Jokhar leh a thawhpuite a kawm a. An hmasawnna bakah harsatna an neih hmanhmawh zawka chinfel ngaite an thlen.
Larsap chuan Aizawl to Vairengte kawngpui four lane-a zauh tur chu la thawh theih rih loh mah se, national highway two lane-a siam mek zaa 60 thawh zawh a ni chu lawmawm a tih thu a sawi a. An hnathawhnaah harsatna an neihte chinfel zung zung dan an dap thiam a ngaih thu leh, 2024 March-ah chuan 2-lane NH kawngpui hi hman theiha siam zawh hman a ngaih thu a sawi a ni.
“Mizoram tan kawngpui tha leh rel kawng a pawimawh takzet a, heng hmasawnna ruhrel liantham leh pawimawh hi siam zawh a nih chuan state economy hmelhmang nasa takin a danglam dawn a ni,” a ti.
Mizorama national highway awm mekah NHIDCL hian enkawl tur a nei thui ber a. National highway siam tur a neih km. 888-a thuiah hian km.248 a siam zo tawh a, km.560 la hmabakin, km.80 a thui siam belh a tum mek bawk.
NHIDCL report danin, JICA sum hmangin NE Road Network Connectivity improvement project phase-I: Aizawl to Tuipang leh phase-II: Aizawl to Tuipang by pass road pali, Ministry of RT&H sum hmangin Bharatmala Pariyojana hnuaiah Seling -Champhai, Lunglei -Tlabung, Tuivai -Keifang leh Vairengte – Sairang siam hna thawh mek a ni. Heng project hnuaiah hian kawngpui 2-lane km. 732.10 a thui chu cheng vaibelchhe 14944.94 sengin siam mek a ni.
NHIDCL hian 4-lane road: Aizawl – Vairengte leh 2-lane road: Keifang -Tuivai road package-II an la thawk leh dawn a. A thui zawng km. 103.11 niin, a siamna atan vaibelchhe 1389 ruahman a ni.
Larsap-in NHIDCL hmalakna thlirpui
