Mizoram Legislative Assembly 9-na session vawihnihna, sawrkar thar budget session hmasa ber ni bawkah Mizoram Governor chuan, thutlukna khirh tak tak siam ngai mai thei dinhmunah kan ding tiin, “Shakespeare-a thawnthua kan hmuh angin Denmark lal fapa Hamlet chuan, nakin zel atana tha turin tuna a lo tawrh a tul thu a sawi ang deuh khan,” tiin a sawi a.
Kan hriat angin tuna sawrkar thar chief minister hian, election campaign lai khan, Mizoram sum leh pai dinhmun a that loh thu leh, sawrkarna siam tur tan pawha phurawm loh ang deuh khan a lo sawi tawh a. Tunah sawrkarna an han siam ta ngei a, budget session hmasa bera Governor thusawiah ‘thutlukna khirh tak tak siam ngai mai thei dinhmunah kan ding’ tih a lo lang nghal a. Shakespeare-a thawnthua Hamleta thusawi, state pakhat rorelna in sang berah, state sawrkar hotu lu ber session speech-a phum tel a lo ngai ta hial a.
Thildang chu dahthain, agriculture chungchanga Governor thusawi hi han tuihnih ila. Mizoram GSDP 26% vel hi agriculture leh a kaihhnawih atanga thawh chhuah a ni, a ti a. “Ka sawrkar chuan agriculture leh a kaihhnawih sector-te hmasawnna chu a ‘ngaih pawimawh ber’ a ni ang,” tiin a sawi zui a.
‘Agriculture hi thingtlanga chengte eizawnna pawimawh ber’ tia Larsap-in a sawi hi a dik em em rualin, thingtlanga chengte chauh pawh ni lo, Mizoram pumpui innghahna pui ber a nihna hi kan la varpawh tawk lovang tih a hlauhawm hle. “Ngaih pawimawh ber” tih hi a pawimawh a, “ber” tih hian a kawh chu, ‘thildang zawng aia dah pawimawh, dah chungnun’ tihna a ni.
Tunhmain a thu chuan agriculture hian ngaihpawimawh a hlawh em em fo; mahse, a takah hmalakna liantham hmuh tur a awm ngai lo, chu chu sawifiah vak ngai lovin kan tun dinhmun mek hian a lantir chiang tawk hle. Agriculture hian ber’ a hauh a, hma lak tak tak a nih phawt chuan, GSDP-a a contribution pawh a let aia tamin a pung ang a, economy chawisangtu ber a ni dawn tih a chiang a ni.
Larsap thusawi leh a behbawm…
