Daily Newspaper

Larsapin AIIMS din tura a dil hi

16

Mizoram Larsap P.S. Sreedharan Pillai chuan Prime Minister hnenah Mizoram tana thil pawimawhte tunhnai khan a thlen a, Mizoram chhunga health sector chungchang ngaih pawimawh bik a tulzia sawiin, Mizorama All India Institute of Medical Sciences(AIIMS) dinsak turin a ngen a.

Hetianga Larsap-in Prime Minister hnena Mizoram mamawh a thlen hi a lawmawm hle a, Larsap meuhvin hmaichhana PM hnena Mizoram harsatna a thlen hian ngaih pawimawh pawh a hlawh ngei turah a beisei theih awm e.

Tuna Mizorama medical college din chungchangah pawh hian, Mizoram Governor pariatna MM Lakhera khan, MZU Convocation rawn hmanpuitu, khatih laia India President Pratibha Devisingh Patil hnenah khan hmaichhanah Mizorama medical college din turin a lo thlen tawh bawk a. Mizoram sawrkar pawhin medical college din a nih theih nan a bawhzui zel a, tunah chuan medical college a lo piang ve ta a ni.

India rama Institute of National Importance zingah, AIIMS hi Northeast huamchhunga la awm ve lo a ni a, West Bengal ami hi India hmarchhak lama awm hnai ber a ni mai awm e. Tun dinhmunah India ram state hrang hrangah AIIMS hi 15 a awm mek a, tunah hian kum 2025-a hawn theih turin 8 buaipui leh mek a ni bawk.

Mizoram hi hriselna kawngah dinhmun tha lo takah a ding mek a. India rama cancer vei tamna a nihna ringawt pawh hi zirchian tham a ni a, medical sciences hmunpuiin a thutchilhna tham a ni. Larsap hian hriselna kawnga Mizoram dinhmun thatlohzia hmua hetianga thahnemngai taka PM hnena ngenna a thlen hi, sawrkar pawhin chak taka a bawhzui phawt chuan, a hlawhtling ngeiin a rinawm. Larsap meuhvin hmaichhana mamawh a thlen hi a lo dawngsawngtute lam pawhin an thlir liam mai mai hauh lo ang a, chutih laiin, a hlawhtlinna hmu tur chuan, tanrual a pawimawh a, chutah chuan political party dangte pawhin politics thila inepna dahthaa, Mizoram tana tha tur leh pawimawh tur chiah hi chuan, sawrkar lai thawhpui thiam te pawh hi an zir a pawimawh dawn a, chutiang bawkin, pawl hrang hrangte pawhin, sawrkar laipui lam nawrpui tura tha thawh thiam te pawh a tangkai hlein a rinawm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy