Last 16 lut hmasa ber Arsenal

Thawhleh zan khan UEFA Champions League 2025-26 – League round khelh chhunzawm a ni a, table chung ber luahtu Arsenal in mikhual an nihna hmunah Inter Milan an hneh. Inter Milan laka chak Arsenal hi last 16 lut chiang hmasa ber an ni. Arsenal rual hian London club lian Tottenham Hotspurs pawhin hnehna an chang ve bawk.
Dal theih loh Arsenal
Season kal mekah inelna hrang hranga khel tha tak Arsenal hi Europe a football club te inelna lian leh ngaihhlut hlawh ber Champions League-ah an chetha viau a, vawi ruk zet chak zawn tawhin, an kawng dal thei an awm lo. Season liam ta UCL-a pahnihna Inter Milan lakah phu takin hnehna an chang zui leh a, vawi sarih ngawt an chak zawn ta hial a ni.
San Siro-ah Inter Milan hmachhawn tura lenglut Arsenal in bul an tan tha a, goal an thun har lo. Pathianni zanah Manchester United hmachhawn tur an nih vangin Mikel Arteta chuan a player tha thenkhat a awltir a, an that theih dan ang berin Inter Milan an hmachhawn lo. An player tha thaenkhat awltir bawk mah se goal an thun thuai tho thung. Inkhel tan atanga minute 10-na lekah Gabriel Jesus chuan Jurrien Timber cross chu hnaite atangin a pet goal a, hmahruaina goal a thun.
Hma takah goal an thun vangin Arsenal an phur a, inrintawkna sang zawk nen an inlan zui thei bawk. Europe-a chetha em em Arsenal lakah Inter Milan in ngai an awh lova, goal an chhuah hmasak vangin an dinhmun a chhe leh zual. Goal an chhuah hian an muthlu a kaithova, an harh zawk a ni ber. Na taka an khinguite nawr let nghalin goal pawh an thun thuai. Goal an chhuah atanga minute 8 hnu lekah fuh zetin Arsenal an tlarhnung an nawr tlang. Arsenal in an thenfai hleih theih loh ball kal chu Petar Sucic chuan box pawn atangin top corner-ah kawh mar pawtin a pet goal a, minute 18-naah an si phurh a sut.
Team lian pahnih; Arsenal leh Inter Milaan te inkhel tur hian ngaihven a hlawh a. Hma taka goal hnih a lut hian inkhel ngaihven hlawh hi a tihmuhnawm leh zual a, beisei lawk ang ngeia inkhel hmuhnawm a ni tih a nem nghet.
Goal khat ve ve an thun hnuin an innawr tawn zui viau a, Arsenal bawk an che fuh nawn leh. Ball kanga hlauhawm thin Arsenal kha ball kangah bawk hlauhawm chhunzawm lehin, corner an chhawr tangkai zui leh. Corner atanga ball kal chu Leandro Trossard chuan hlauhawm taka tauhin goal bar a tauh ber dawp. Ball per let leh hi goal hmahruai thuntu Gabriel Jesus chuan hnaite atangin a lo tauh goal a, minute 31-naah hma an hruai nawn lehna goal a thun. Gunners hian Jesus goal hnih thun hmangin 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Arsenal bawkin goal an thun leh. Inkhel hmuhnawm takah goal lut a awm belh theih loh reng hnuin goal thun mamawh Viktor Gyokeres chuan goal a thun. Bench atanga lut Gyokeres hian minute 84-naah fuh zetin a pet goal a, an hmahruaina a tizau. Gyokeres goal thun hnuin goal dang a luh belh thei tawh lova, Arsenal chuan team lian Inter Milan lakah hnehna changin, point thum hlu tak an hmu.
Chet that an harsatna thin Italy rama hnehna chang Arsenal hian UCL season kal meka an khingpuite an la hneh vek a, vawi sarih an chak zawn ta chiah. Gunners hian khelh 7 atanga point 21 hmuin table chung ber an luah zui zel a, last 16 lut chiang hmasa ber an ni nghal bawk. Arsenal laka tlawm Inter Milan in khelh sarih atanga point 12 hmuin pakuana an luah ve mek thung.
Hliam vanga chawl rei tak Gabriel Jesus chu goal hnih ngawt a thun vangin a lawm ngang mai. Jesus hian inelna lianah goal hnih a thun le ta mai chuan lawm vanga a mittui a tlak hial thu a sawi. Jesus hian Gyokeres goal thun pawh a lawmpui thiam viau a. Havertz pawhin remchang hmuin, goal a thun thuai tur thu a sawi tel bawk. Arsenal tlarhma player te an dam kim ta a, inelna thianghlim hmachhawnin, goal an thun vangin an inlawmpui thiam viau bawk.
Tottenham an chak : Inter Milan mualah Arsenal an chak laiin London club lian Tottenham pawhin hnehna an chang a, Spurs hian an mikhual Borussia Dortmund chu 2-0 in an lo hneh.
Tottenham hian an mualah bul an tan tha a, minute 14-na lekah Cristian Romero chuan hmahruaina goal a thun nghal. Goal an chhuah hnuin Dortmund an vanduai zui leh a, Daniel Svensson chu minute 26-na lekah hnawhchhuah a ni. Tam zawk an nih hnuin Spurs tan Dominic Solanke chuan minute 37-naah an goal hnihna a thun a, an mualah an chak zui ta a ni.