Asian Cup khelh mekah Thawhlehni khan round of 16 match pakhatah penalty shootout hmanga 4-2-a Saudi Arabia hnehin South Korea chuan quarter-final an lut.
Team pahnih hi hun pangngaiah sikhat ve ve thunin an inhnehtawk a, penalty pet hmanga chak zawk zawnah Korean an vannei hram a ni.
He inkhelah hian Arab lamin goal thun hmasain, second half thah fel hnu lawkah half-time substitute Abdullah Radif chuan Saudi Arabia chakna goal ni zui thei tura ngaih a thun a; he goal khat hi last eight an luhpui thei dawn takngiala a lan hnu hun pekbelh minute kuana a kal mek laiin Cho Gue-sung chuan South Korea siphurh a sut a, goal dang a luhbelh zawh loh hnuah penalty shootout-in a zui ta a ni.
Shootout-ah hian Saudi player pahnihin an thelh hnuah Wolves forward Hwang Hee-chan chu Korea tana hun pawimawhah a a rawn penchhuak a, a chhuihluh rualin a team-in quarter-final an lut.
Kum 1956 leh 1960 champion Jurgen Klinsmann-a team South Korea hian last eight inkhel pakhatah naktuk hian team khawng dang Australia an hmachhawn zui leh dawn a ni.
Korean-ho hi kum 64 zet he tournament-a champion tawh lo an nih avangin Qatar ram Asian Cup kal mekah hian an tum a ruh hle tih an khelh dan atangin a lang a, a vawithumna atana an trophy hawn kum ni thei tak ang maw?
Last 8 lut South Korea
