Govt. Mizoram Law College chuan August 25 khan an kum 40 tlin champha Ruby Jubilee an lawm.
He hun hmanpuitu Law & Judicial minister TJ Lalnuntluanga chuan Govt. Mizoram Law College chu Mizoten dan leh hrai kan hriat theih nana thawhhlawk tak a ni tiin, he hmun atang hian lawyer leh judge chhuanawm tak tak an lo chhuak tawh tih a sawi. Zirlaite chu midangte tana malsawmna nih tum tlat tur leh rethei leh hausa inkar zau tak tizim tura theihtawp chhuah turin a chah.
“Kan ramin hnasawnna leh changkanna kawngah ram changkang zawk leh upa zawkte a um ve mek zel a. Hetih mek lai hian duhkhawp lohna a awm chang pawhin, rilru leh ngaihtuahna hrisel pu tlat a, ram hruaitute sawisel mai loin, finchhuahtu nih tum theuh ang u,” a ti.
Thalai la naupang tak tak zingah rilru lama harsatna – depression /anxiety nei an tam lutuk chu veiawm a tih thu TJ Lalnuntluanga hian a sawi a. Thalaite chu lehkha zir bakah zirlai tibahlah loa kohhran leh khawtlanga inhman nachang hre turin a chah. “Kan ramin a mamawh chu, mithiam chauh niloin mithiam rilru hrisel pu a ni a, hemi tur hian kan nun kan uluk pawh a tul hle. Dan hremite hi miten dan hnuaia an chanvo dik tak an hmuh theih nana hma laksaktu kan ni a. Dan hriatna a dik lo zawnga hman erawh harsatna thlentu a ni,” tiin, tanpui ngaite rilru dik tak pu chunga tanpui zel tur leh tha leh dik nia an hriatah huaisen taka ding turin a chah.
Mizorama Law College hmasa ber Aizawl Law College chu 1983 August 25-a din a ni a; hemi ni vek hian law class hmasa ber chu JL High School Khatlaah neih tan a ni. Saingura Sailo chu principal hmasa ber a ni. 1983 September 7-ah hetihlaia chief minister Brig. Thenphunga Sailo chuan Aizawl Law College hi a hawng a ni.
1996 July 31-ah Liandingpuia Law College a ding ve leh a, hemi kum September 14-ah khatih hunlaia chief minister Lal Thanhawla’n a hawng. State sawrkar hmalaknain law college pahnih hi Aizawl Law College registration hmangin 2004 July 1-ah chhunfin a ni a. A hmingah Mizoram Law College tih a ni.
2006 August 25-ah deficit grants -in- aid status-ah hlankai niin, deficit college a nih angin state sawrkarin Governing Body member tur kum hnih chhung zel atan a ruatten college hi an enkawl a ni. Mizoram University hnuaiah permanent affiliation neiin, UGC recognized institution a ni a. Grant dawng theite zingah tel ve in, college tih changtlunna tur building grant a dawn atangin Women’s Hostel pawh din a ni. 2013 September 19-ah provincialisation hmuin Govt. Mizoram Law College tih a ni a. 2019 February-ah a vawikhatna atan NAAC accreditation endik hmachhawnin, hetah hian ‘C’ grade a hmu a, accredited college a ni ta a ni.
Tunah hian zirlai 187 awmin, mi 700 chuangin LLB degree an nei tawh a. Faculty 9, administrative staff 13 leh Library staff 3-ten an enkawl a ni.
Law College kum tlin lawm
