Daily Newspaper

Lawgtlai district-a inbiakpawhna dinhmun sawi

27

Lawngtlai district chhunga inbiakpawhna leh internet service tihchangtlun dan tur sawi hoin Thawhtanni khan district bawrhsap Dr Andrew H. Vanlaldika hoin thutkhawm a ni a. BSNL (Bharat Sanchar Nigam Limited), Bharti Infratel Limited (Airtel) leh Jio aiawhte an tel.

Bawrhsap chuan Lawngtlai district-in inbiakpawhna leh internet service-ah hun rei tak chhung harsatna a lo tawk tawh tih a sawi a. Covid-19 leng vanga zirlaite tana online class kalpui a nih hnuah phei chuan district mipui, a bikin zirlaite leh nu leh paten harsatna an tawk nasa zual tih sawiin, internet service pechhuaktu (provider) te chu tan la lehzual turin a chah. “Mipuiin an sum sen ang hu service an hmu pha lo nasa hle hi ngaihthah chi a ni lo,” a ti.

Thutkhawma tel service provider-te chuan an harsatna tawh hrang hrang sawiin, khawl chak tawk tawh lo leh consumer tam zel vanga khawlin a zawh lohte, tower din belh ngaite, khuarel leh mihring kut avanga hrui chat nasate, thawktu indaih lohna leh Covid-19 vanga an harsatna tawhte an sawi. Heng harsatnate hi chinfel a nih theih dan tur sawi ho nghal a ni.

Service provider-te chuan mipui harsatna an hriatpui thu leh theihtawp an chhuah ve thin thu sawiin, khawl thila harsatna tam tak chu mipuite pawhin hriatthiampui se an duh thute; social media-a phun lungawipui mai loin, service provider-te hnenah thlen thin se, harsatna tam tak chu chinfel theih a nih an beisei thute an sawi bawk.

Lawngtlai khawpui chhung bikah BSNL hian Chawnhu leh Vengpui-ah tower neiin, tower dang pakhat a awm belh leh chuan ziaawm tura beisei a ni a. Airtel-in Lawngtlai khawpui chhung bikah tower site 5 neiin, Circuit House-a tower thar dah tur leh power backup neihte chu harsatna zualpui chinfel nan buaipui thuai nise, tih a ni. Jio chuan Chawnhu leh College Vengah tower neiin, hei hian L-IV leh Council Veng a chawm tel bak chu Lawngtlai khawpui pum an tuam theih rih loh avangin tower thar dah belh a tul thu an sawi a ni.

Heng service provider-te hian district pum tuam tura hma la chho mekin, tower pawh an din belh a. Bharti Infratel Limited chuan Department of Telecom hnuaia Universal Service Obligation Fund (USOF) atangin Lawngtlai district chhunga inbiakpawhna tichangtlung turin Comprehensive Telecom Development Plan for North-Eastern Region (CTDP-NER) an kalpui mek a, tower 84 din turah 60 chuang chu a taka puitlin a ni tawh a, a dang pawh thawh mek a ni tih an sawi.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy