May ni 14 a ni a, Mizoramah HSLC result a chhuak. Zirlai hlawhtlingte leh an nu leh pate hlim ni a ni. Sarah-i pawh a lawm a, a result a hriat rualin a mittui a tla nghal zawih zawih.
Myanmar-a hun engemaw chen sikul an kal theih loh hnua hlauva tlanchhia, a tlanchhiatna hmuna lehkha zir a ni a, zak ngawih ngawih chunga bultan tha leh, uniform leh zirlaibu pawh nei lova sikul kal ve tawp a ni. Tunah chuan matric a pass ta! Amah chu Sarah Bawi |ha Len Par a ni.
“Pass pawh ka inring lo a, mahse ka lo pass sia… Mak ka ti a, ka tap tawp!” a ti.
Sarah-i te hi 2021 April-ah Tahan atangin Khawbung-ah an raltlan a, Khawbung-ah hian pawl 8 atangin a zir. 2019-ah khan Myanmar-ah chuan Covid vangin zirna in an lo khar tawh a, Sarah-i pawh sikul a lo kal lo rei tawh. Khawbung an thlen hnuah Mizoram sorkarin raltlan naupangte sikul kal turin an ti tih a’n hria chu, a lawm em em mai a, phur takin zirna bul a tan tha leh ta a ni.
A sikul kal tan ni te, a luh tirh lamte a la hre reng a, a lung te pawh a la tichhe thin. Kum laklawha kal an ni a, a nu nau fanu, raltlan ve bawk nen KM Middle School-ah bul an tan a ni.
Hmelhriat an nei lo a, neih loh dang pawh an nei; uniform an nei lo a, zirlaibu pawh an nei lo. Pen leh lehkhapuan nen an kal ve tawp a, “Ka zak lutuk, zak chung chungin ka kal,” Sarah-i chuan a ti.
An zirtirtute an lo fel a, uniform pawh an neih hma chuan an ngaihhnathiam dawn tih te an lo hrilh. Zirlai dangte an lo fel a, an tlangnel zui ve mai. Pawl 8 a pass a, Govt Khawbung HS-ah a zir zawm. Tunah chuan matric a pass ta.
“Kan zirtirtute an fel a, kan chungah an tha a, naupang dangte pawh an fel a, nuam ti takin sikul kan kal,” a ti.
Pawl 8 an nihin Mizo tawng ziak leh chhiar a zir tha leh a, A AW B a thiam sa na a, an khaw lama an tih dan nena inang lo a lo awm. English-ah a chak lo a, zir fe a ngai. A la hriat ngai loh Hindi zir thar leh a ngai bawk.
“Sikul kan kal tirh kha ka la hria a, ka zak a. A zakzum chi ka ni a, thian kawm te pawh ka thiam lo a. Mahse sikul ka kal thei kha ka hlim em em a, kan lo kal lo rei tawh a, sikul ka kal leh kha ka lawm tawp,” Sarah-i chuan a ti.
Pawl 10 a nih pawhin a la zak a, rualpawl thiam lo inti, mi bula awm dan tur hre lo inti a ni. “Ka sawi thiam lo, mi hmai ka khap lo,” tiin anmahni sawi danin hemi chungchang hi a sawi.
Taima takin a zir a, zan dar 6.30 vel atanga zan dar 12 vel thleng lehkha a zir thin. Mobile phone a nei a, mahse a khawih nasa lo. Zan dar 8 velah minute 20 vel a chawl thin a, chumi chhung chuan phone a khawih thin. A nu leh pain phone khawih an khap lo a, “Chutiangin khap ka ngai lo,” a ti.
Zing karah pawh lehkha a zir a, tlai lam erawh eirawngbawl a ngaih avangin a zir vak lo. Home work an ngah deuh changin tlaiah hi chuan a zir.
Vawk an vulh a, chaw te pawh a pe thin. A nu leh pa an hman loh chuan vawk chaw hi a chhum thin bawk. Huan an nei a, chuta kal chu nuam a ti; chawhmeh te pawh a la ve thin.
Bible a chhiar thin a, “Bible hi ka chhiar taima,” tiin Bible a chhiar thin thu a sawi. Lehkhabu dang pawh a chhiar thin a, an zirtirtute’n chhiar tur an pek thin thu te pawh a sawi.
HSLC result a chhuah khan, phone atanga en a tum a, mahse a en thiam lo. A thiante’n a result an hrilh a, first division-ah a pass!
“Ka lawm lutuk a, ka tap tawp!” a ti. “Ka rilruin ka tawngtai a, ‘Awi! Lalpa, ka lawm lutuk, pass pawh ka inring lo asin,’ ka ti a,” tiin a tawngtai nghal thu a sawi a, Khawbung-a a sikul kal tirh lam te a rilru-ah a lo lan thu sawiin, “Ka ngaihtuah a, ka lung a leng a, mak ka ti a,” a ti.
A tukah pawh a’n ngaihtuah let leh thin a, “Lung a chhe lek lek,” a la ti!
Lawm avangin mittui
