Lawng an beih vangin US-in Houthi-te a bei let
US chuan ‘thutlukna feltak siama na takin’ Yemen-a Houthi helte chu thlawhna atangin a kap tih President Donald Trump-a’n a sawi a, Red Sea-a lawngte an beih fo vang niin a sawi.
“Iran-in a puih Houthi mi sualte hi US thlawhnate missile-in an kap a, kan sipai leh thawhpuite an bei bawk,” tiin Trump-a hian a Truth social platform-ah a tar lang a. ‘Lawng suamna, tharum thawhna leh firfiaka chetna’ hi ‘dollar tluklehdingawn tel’ man a nih thu leh mi tam tak nunna a tiderthawng tih a tar lang bawk.
Houthi enkawl health ministry chuan mi 15 vel an thih thu leh mi dang pakuain hliam an tawrh thu an puang.
Gaza-a Israel-Hamas indona a chhuah atanga lawng bei fo thin pawl hian US beihna chu an chhan let ngei dawn thu an puang ve nghal.
Houthi chuan Inrinni thimhlim khan an pawl tamna, Sanaa leh hmar lama Saada province, Saudi Arabia nena an inrina velah thil puak tam tak a awm thu an sawi.
Iranian-te thlawp hel pawl hian Israel chu an hmelma tih an sawi a, Sanaa bakah Yemen hmarthlang lam thununtu an ni a, khawvelin sorkarah erawh a pawm lo.
Thlalak darhah chuan Sanaa thumhmun, sipai hmunah mei khu dum tak tak hmuh a ni a, finfiahna erawh a awm lo.
Thuchhuah an siamah Houthi hian US leh UK chu Yemeni khawpui, Sanaa-a mihring chenna pawh ‘mawl taka’ beiah an puh a; mahse, Inrinnia kahnaah hian UK an tel lo thung.
Trump-a chuan Houthi chetnate chu an ngaidam mai mai dawn lo tih a sawi a, “Kan tum kan hlen hma chu na takin kan che zel ang,” a ti.
Iran Foreign Minister Abbas Araghchi chuan US sorkar hian ‘Iran-in ram dang a kawmngeih danah thu a nei lo va, a tel vena tur a ni lo’ tih a sawi ve nghal.
“Israeli-te mi suatna leh firfiaka chetna a thlawp hi tawp rawh se,” tiin Pathianni khan X-ah a tar lang a. “Yemeni-te thah hi tawp rawh se,” a ti bawk.
Houthi hian Gaza-a Israel leh Hamas indonaah khan Palestinian an thlawp tih an sawi a, lawng an beih pawh Israel, US leh UK nena inkungkaihna nei chauh an nih thu an sawi.
November, 2023 atang khan missile, drone leh lawngleng tenau hmangin Red Sea leh Gulf of Aden-a sumdawng lawngte an bei tan a. Lawng pahnih tipilin pakhatah thawktu pali an that bawk.
Khawthlang ramten indo lawng chhawp hnaiin an tawmim phah a. US leh British thlawhnaten an hmun an kahsak tawh bawk.
Israel pawhin July thla atang khan Houthi-te hi beiin missile leh drone 400 vel hmanga an beih chhan letna niin Israeli sipaite chuan an sawi.
Shipping company tam zawk chuan khawvela tuipuia sumdawnna kal vel 15% dawn innghahna, Red Sea hi Houthi chetna avangin an zawh duh loh phah a, Africa helin kawng hla zawk an zawh phah.
Suez Canal hi Asia leh Europe inpawhna awlsam ber niin tuialhthei leh liquefied natural gas (LNG) inthawnna kawng ber a ni.
Houthis hian November, 2023 leh October, 2024 inkarah Red Sea-ah hian vawi 190 zet lawng an bei niin US Congress chuan a tar lang.
Lawng an beih vangin US-in Houthi-te a bei let
