Lawng hmanga insumdawn tawn theih dan dapin Transport minister TJ Lalnuntluanga chuan Tuivai lui leh Tuiruang lui a enfiah.
Mizoram leh Manipur inrina, Tuiruang leh Tuivai infinna, Tuivai lui chu Thawhlehni khan Transport minister hian lawng hmanga tlawhin, Mizoram leh Assam insumdawn tawnna atan hman tangkai a nih theih dawn leh dawn loh a hmunah a enfiah a; Nilaini zing khan Zokhawthiang /Kaa-ni a Tuiruang lui kam a enfiah bawk.
Tuivai lui hi Manipur Tipaimuk lam atanga lutin, state pahnih inrina, Manipur Sihpuikawn khawtlang chuan TJ Lalnuntluanga hi lo hmuakin, Manipur leh Mizoram inrina Tuivai lei tha taka dawh a nih theih nan theihtawp chhuaha tan la turin an lo ngen.
Zohnahthlak hnam hrang hrangte khawvel ramri then dan angin ram hran leh state hranah awm mah ila, thinlunga inpumkhatna in min suihkhawm mek a, inkalpawh tawnna tha neih chu hnam inpumkhatna’n a pawimawh tih hriat thar a tul tih a sawi.
Zohnahthlak inpumkhatna’n theihtawp chhuaha MNF sawrkar Pu Zoramthanga kaihhruaiin hma a lak thin thu leh a lak zel tur thu a sawi bawk.
Tuiruang lui, Zokhawthiang leh Ka-ni hmunhma, luikamte chu lawng hmanga Mizoram leh Assam/ Silchar inkalpawhna atana hman tangkai a nih theih dawn leh dawn loh a hmunah Transport minister hian a enfiah leh a. Tuivai leh Tuiruang lui chu lawng hmanga Mizoram leh Assam inkalpawhna leh bungraw chawkluh tawn nana tangkai taka hman theih a beisei thu sawiin, chu chu Mizoram hmar lam, he luidung chhehvel khua leh mipui tan thil tangkai leh pawimawh tak nia a hriat thu a sawi a ni.