Lawngtlai district-a dan loa lut leh sumdawng khuahkhirh tum

Lawngtlai district-ah ramdangmi dan loa lut leh dan phal loha sumdawng an awm leh awm loh enfiah a, khuahkhirh deuh tum an ni.
Lawngtlai addl DC David Lalrinawma kaihhruaiin dan loa an district-a lut thinte leh sumdawnna chungchang ngaihtuahin Ningani khan thutkhawm a ni a. District administration lam leh Central YLA aiawh an tel.
Addl DC chuan dan loa Lawngtlai district-a lut tur ven chu tihmakmawh leh hna hmasaa neih a tul tih a sawi a. Hotel/ homestay neite chu mikhual an neih dan felfai taka chhinchhiah tur leh DC office-a report thehlut turin a chah.
Thutkhawmah hian dan loa lut an awm leh awm loh enfiah thin nise, Assam Rifles- in permit an nei em tih finfiah thin se, an ti a. Permit-in a phal chin piahlam thlenga awmte zawnchhuaha thawnhaw nise, an ti a. Free movement regime piahlam thlenga lo lutte zawnchhuah hna, surprise checking neih thin nise an ti.
Sumdawnna bikah LADC nen inrawn tlanga sumdawnna hmun tur fel tak siamin, he hmunah chauh sumdawn phal nise, uluk takin trade license endik nise tih a ni. A hma lamin LADC, MADC, Siaha leh Lawngtlai district official leh NGO-te thutkhawm nise an ti bawk.