Site icon The Aizawl Post

Lawngtlai district-a raltlan dinhmun sawi

Kuki- Chin National Army leh Bangladesh Army te inkah avanga Bangladesh atanga Lawngtlai district-a sahimna zawnga tlanlutte dinhmun leh hemi kaihhnawiha ramri chhehvel leh district chhunga venhimna leh mipui himna chungchang sawi hoin Nilaini khan Lawngtlai bawrhsap David Lalthantluanga hoin hybrid mode (offline leh online) a thutkhawm a ni.
District administration, District Police, Border Security Force leh Assam Rifles official-te telin, Bangladesh atanga raltlante sahimna leh district mipui himna leh ralmuanna kawnga harsatna awm theite vawnhim zel a nih theihna’na hma lakna tur ruahman a ni.
Bawrhsap chuan ramri kana chetvelna leh khawsakna chungchangah sahimna zawnga tlanlutten harsatna an tawh lohna’n leh hemi phena dan bawhchhiatna leh ram chhung himna tichhe thei thil thleng a awm lohna’n district administration, police leh ramri vengtu sipaite inkarah inbiakpawhna leh thawh hona tha a awm a pawimawh tih a sawi a. Raltlan chungchangah social media-a thuthang dik tawk lo thehdarh a ni thin chu pawi a tih thu leh, chu chuan official-te tan harsatna a siam thin thu sawiin, thu dik tawk lo thehdarh lo tur leh social media kaltlanga an thu hriat apiang awih mai lo turin mipui a chah.
Parva-III mipui rikrap zawnga BSF-te chetna a awm nia puhna chu BSF hotute chuan pha in, ramri venhimna leh ramchhung himna atana an tih tur chin chauh an tih te, raltlante dinhmun hrethiam tak chunga mipui harsatna siam lo thei ang bera hma an lak thin thu an sawi a. Hemi chungchangah hian thil hriatsual a awm zel loh na’n ramri vengtute leh mipui inkara inhriatpawh tawnna tha a awm theih nan hma lak ni se, tih a ni. Ramri vengtu sipaite chuan raltlante inphen nana hmang a, ramri kana dan loa chetna – ruihhlo leh ralthuam tawlhruk leh dan bawhchhiatna dangte, ramchhung himna leh ralmuanna tichhe thei zawnga chetna a thlen loh na’n fimkhur taka hma lak reng a tul tih sawiin, hemi kawnga hmalak zui zel dan turte sawi ho a ni.
District thuneitute chhinchhiah danin, Bangladesh atanga tlanlut hnuhnung ber hi mi 53 niin, kumin February 17 khan an lut a. Lawngtlai district-ah November 2022 leh a hnulama Bangladesh atanga raltlan lut mi 541 (mipa 291 leh hmeichhia 250) an awm mek. An zinga 337 chu kum 18 chunglam niin, kum 18 hnuailam 204 an awm a. Hengte hi an district chhung khaw 8-a relief camp-ah an awm a ni.
Raltlante hi district thuneituten ngun taka vilin, ei leh in, mutbu leh nitin mamawh zualpui engemaw zat pek an ni a. Police lamin security thilah vil rengin, Health department atangin damdawi mamawh pek an nih bakah health clinic buatsaihsak an ni a. Tlawmngai pawl atangin a hmuna kalchilha chhawmdawlna pek niin, kohhran leh mimal atang pawhin chhawmdawlna engemawzat a lut a. District thuneitute chuan raltlante hi khairual zawka chhawmdawl leh enkawl an nih theihna’n tanpuina pe turten district administration kaltlang emaw an hriatpui emawa pek nise tha an tih thu an sawi.

Exit mobile version