Tunlaia Lawngtlai leh Siaha lama power supply mumal loh chhan zawtfiahin Nilaini khan Lawngtlai MJA chuan Power & Electricity department hotute an hmu.
MJA Lawngtlai District hian Lawngtlai Power Division executive engineer David Chakma hmu in, tunlaia kawlphetha mumal lo leh voltage hniam lutuk chungchang an sawipui a. EE hian, Lawngtlai leh Siaha tan an mamawh khawp kawlphetha an dawn rualin, line tha lo leh khawl thila felhlel a awm changte, line siam ngai a awm changin a khaihlak thin tih a sawi.
Voltage a hniam chhan chu, Lawngtlai leh Siaha district-ah kawlphetha hmangtu an pun nasat bakah kawlphetha heh chi hmanrua hmang an tam tawh vang tih sawiin, he harsatna sukiang tur chuan 132kV Sub Station Chawnhu ami chu a taka kalpui a ngai tih a sawi. Tun dinhmunah 132kV Sub Station hi hna zaa 95 vel thawh zawh tawh a ni tih a sawi.
P&E department hotute chuan, 33kV Sub Station atanga semchhuah kawlphetha chu, mi nawlpuiin kan hmang nasa a nih pawhin, kawlphetha heh chi hman tam loh chu voltage sang zawk neih theihna kawng khat a ni tih an sawi a. Mipui lamin mahni mamawh bak kawlphetha hmang lo turin an ngen tih sawiin, connection an lak dawna an hman mamawh tur zat an ruahman aia nasa hman chu dan bawhchhiatna a ni tih an sawi a ni.
Lawngtlai leh Siaha district-in kawlphetha mumal leh tha zawk an neih theihnan thuneituten tan la zual se an duh tih MJA Lawngtlai hian sawiin, Chawnhu-a 132kV Sub Station peihfel thuai a nih theihna tura sawrkar hmalakna lawmawm an tih thu an sawi bawk.
Lawngtlai leh Siaha lama power mumal loh chhan zawt
