Rural Development minister Lalruatkima chuan Thawhtanni khan Lawngtlai tlawhin RD department hnuaia District Rural Development Office (DRDO) leh Block Development Office (BDO) a thawktute nen an inkawm.
Lawngtlai DRDO project director Marilyn Rualzakhumthangi leh thawktu dangten lo dawngsawngin, officer leh staff-te nen an hnathawhna kawnga harsatna leh mamawh an neih bakah hmasawnna tur rawtna an lo thlen.
Minister chuan Mizoram chu India ramah scheme leh project ti tha berte zingah a tel tih sawiin, kum 4 chhungin MGNREGS-ah ni 100 inhlawhna an siam zat zat theih thu te, kumin kum tharah ni 100 inhlawhna siam leh theih beisei a nih thu leh, kum 5 chhungin “Ni 100 inhlawhna” tih hming putu MGNREGS chu a hming ang ngeia dik taka kalpui theih a ni tur chu lawmawm a tih thu te a sawi.
RD Department hnuaia scheme hrang hrang kaltlangin Mizoramah, thingtlang kilkhawr ber thlengin hmasawnna ruhrel tam tak din niin, tuihna humhalh leh tihpun kawngah te, faina leh thianghlimna kawngah leh mipuiin eizawnna ngelnghet an neih theihna’n te hma lak a ni a, hmasawnna hmuh tur tam tak a awm tih a sawi.
RD department-a thawktute chu anmahni dawrtuten an hriatthiam loh leh an hriat duhte dawhthei taka hrilhfiah a, miretheite innghahna leh tlukluh ngamna nih tum zel turin a chah a. Sawrkar hnathawkte tan social media hman dan thiam a pawimawh tih sawiin, thawktute chu an thiamna tuaihriam zel tur leh tha zawka hna thawh tum zel turin a chah.
Lawngtlaia RD hotute leh minister inkawm
