Lawngtlaiah mipui dawr theihin sawrkar department inpho hnai

Lawngtlai district bawrhsap pisa bultumin sawrkar department hrang hrangte chu hmun khatah kalkhawmin anmahni dawr duhtute tan an inphochhuak.
Bawrhsap pisa huaihawt hian kumin August 23 khan ‘Citizen Care- Grievance Redressal Day’ (Khua leh uite ngaihsak- harsatna chinfel Ni) hman tawh chu a thawhhnihna atan Thawhlehni khan neih a ni a. Chawhma dar 11.00 atanga chawhnu dar 2.00 thlengin sawrkar department hrang hrang chu mipui dawr theihin an inpho hnai a ni.
Sawrkar department 13 – Police, PHE, P&E, PWD, Health (CMO), Transport (DTO), Taxation, Civil Supplies (DCSO), DRDO, Election office, Education (DEO) leh lead bank (SBI) bakah bawrhsap pisa chu mipui dawr theihin dawhkan hrang hrangah an inpho a ni.
‘Khua leh tuite Ngaihsak-Harsatna Chinfel Ni’ hman tawhah mipuiin an hlutin an ngaipawimawh hle a, mi thahnem takin department hrang hrang inpho chhuak hi dawrin, harsatna an neihte an thlen a ni.