Daily Newspaper

Lawngtlaiah partial lockdown puang thar leh

6

Lawngtlai district magistrate chuan 2020 December 7 chhun atanga December 8 zanlai thleng Lawngtlai khawpui chhungah partial lockdown a puang.

Lawngtlai district chhungah Covid-19 kai hmuhchhuah belh zel a ni a, mipui him tlan nan leh contact tracing leh sample endikte chak leh felfai zawka kalpui a nih theih nan District Level Task Force chairman ni bawk Dr Andrew H. Vanlaldika chuan Disaster Management Act 2005 tlawhchhanin Lawngtlai khawpui huamchhungah December 7 chhun dar 12.00 atangin December 08 zan dar 11.59 thleng partial lockdown a puang.

Partial lockdown puan chhunga zawm tur inkaihhruaina pawh a siam a. Lawngtlai town huamchhunga pawnlam atanga khualzin cham mek, mahni khaw lama haw duh turte chu December 7 chhun dar 12.00 rik hmain Lawngtlai khawpui chhuahsan theih a ni a; hemi chhunga chhuak lote chu partial lockdown puan chhungin an veivah phalsak an ni tawh dawn lo a ni.

Lawngtlai khawpui pawnlam atanga partial lockdown puanna huamchina luh leh chhuah (zin veivah) khap a ni a. Hei hian Home Department-in Mizoram luh phalna a pek te, Mizoram pawna chhuak turte, damlohna (medical emergency) leh chhiat tawh thila chhungkhat hnai zual (pi leh pu, nu leh pa, tu leh fa leh pianpui unau) te veivahna a huam loa; heng ngaihhnathiam turte hian sawrkar-in phalna a pek emaw VLTF lehkha emaw an nei tur a ni thung. Lawngtlai kaltlang turte chu kaltlang phalsak an ni a; khawchhunga an din khawmuan erawh phal a ni lo a ni.

LADC MDC inthlanpui neihah December 8 hian result puan a nih dawn avangin inthlan kaihhnawiha mawhphurhna nei candidate leh election agent-ten an veivahnaa harsatna an neih loh nan ruahmanna siam a ni a. Political party-ten inthlan kaihhnawiha party thil buaipui tur mi 20 an inruatte chu veivah phalsak an ni a, chu’ng mite chuan tul bik thilah party office an hawng thei ang. Party tinten anmahni party chhungah sawrkar inkaihhruaina siam – SOP tha taka zawm vek tura tih an ni.

Candidate leh election agent-te chu inthlan thila an tih tur an tih theih nan an veivah phalsak an ni a. An nihna tichiang turin anmahni party office atangin lehkha nei vek tura tih an ni. An lirthei hmanah an nihna tichiang thei lehkha tar vek tura tih an ni bawk. Independent candidate-ten an nihna tichiang turin ID card an insiam thei a, an lirthei hman turah ‘independent candidate’ tih leh an dinna bial hming ziahna tar tura tih an ni.

Partial Lockdown puanna huam chhunga chengte chu phalna nei loin tumahin mahni in leh compound chhuahsan lo turin thupek hian a ti a. Tumah inlen pawh phal a nih loh thu te sawiin, he khuahkhirhna in a huam loh tur chin list siam a ni a. Thupek bawhchhiate hremna tur pawh tihchhuah a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy