League table lerah Real Madrid kirleh ta phawt
Mikhual Valencia laka 2-1 hnehna nen Girona-in La Liga table-a an hmahruaina neikir leh hman zawk mah se Inrinni inkhel danga Real Madrid-in sihnih faia an mikhual Granada an hneh chhunzawm ve leh tak avangin Los Blancos hi table lerah an la inhamtang zui zel.
Bernabeu inkhelah Germa-ny midfielder Toni Kroos-a ball pek tuihnai lutuk hmangin Braham Diaz chuan minute 26-ah Madrid hmahruaina goal khungin, second half tir lam minute 57-ah Rodrygo chuan mualneitu team goal hnihna a thawh ve leh a, table-a a chungber an tawlhchhuahsan chu an luahkir leh nghal.
Tarlan tak angin, Inrinni inkhel hmasa lama Valencia laka point thum an thawhchhuah hmangin Girona chuan La Liga table-ah Real nekchhuakin an hmahruaina an neikir leh hman a; Carlo Ancelotti team hian pahnihna ni chungin khelmual an lut a, an kawtkaia hnehna nuamsa changin a lerah bawk an chho zui leh.
Granada lakah khan Real goal thun khawl ni chho ta Jude Bellingham chuan goal khung zo ta lo mah se Rodrygo goal sialtu a tih theih a, a shot pui tak chu goal-ah lut zo loin keeper-in namlet mah se Rodrygo chuan rebound atangin chiang zawka home team chakna goal a thun theih phah.
Ancelotti team hi inelna hrang hrangah a zawnin match nga an chak tling ta a, tun season Bernabeu game bikah an la tlawm lo bawk.
Inrinni inkhelah an player pawimawh pathum – Vinicius Jr, Luka Modric leh Eduardo Camavinga-te chu hliam avangin chhawr thei lo mah se Granada hneh turin an la tha tawk tih an lantir.
Mak tak maia league hma-hruaitu ni chho ve reng Girona nen hian khelh 15-ah point 38 ve ve neiin, Real Madrid hian goal difference-a an san zawk-na hmangin table-ah a sangber an hauh thei hram a ni.
League table lerah Real Madrid kirleh ta phawt
