Israeli sipai, Lebanon-a lungral hmanga Isua lim vaw chhetu leh he thil thleng thla lo latu sipai chu hrem nan ni 30 chhung sipai hrennaa hren an nih tur thu Israel Defence Forces (IDF)-in an puang.
IDF chuan sipai pahnih, an hming tar lan lohte hi chhui chian a nih hnuah ‘ral bei tur atanga paih’ an nih tur thu an sawi bawk.
Sipai dang paruk, thil thlenna hmuna awm, inrawlh lo leh thil thleng report lo chu a hranin an buaipui dawn tih an tar lang bawk.
Lebanon chhim lama Debel khuaa thil thleng hi tun kar chhung khan a thlalak online-ah a darh nasa a, demna pawh a tam hle a. Israeli Prime Minister Benjamin Netanyahu-a pawhin thil thleng hi mak a tih thu leh a pawi a tih thu a sawi.
Thawhlehnia thuchhuah an siamah IDF chuan he thil thleng chungchanga chhui chiannaah ‘sipaite thiltih dan chu IDF thupek leh hlutna atanga hrang hlak’ tih sawiin, ‘pawi an ti tak zet’ tih an sawi.
IDF sipaite chuan hun rei vak lo kalta khan ‘tual chhung mite nena thawkhovin’ milim chhia hi a dangin an thlak tih an sawi bawk.
Lebanon-a beihpui an thlakna chu Iran thlawp, Hezbollah ‘leh firfiak pawl dangte’ lakah ‘chauh’ a nih thu an sawi a, Lebanese civil mite laka tih a nih loh thu an sawi.
Tual chhung mite chuan he milim hi Israel leh Hezbollah indo laia a mi chengten an chhuahsan ve loh khaw tlem te zinga mi, Debel daia chhungkaw chenna in pawnah krawsa Isua khenbeh lai lim a nih thu an lo sawi tawh.
Debel-a kohhran hotu, Father Fadi Flaifel-a chuan he thil thleng hnu hian BBC hnenah, “Kraws, kan chhinchhiahna thianghlim leh sakhaw chhinchhiahna tihbawlhhlawh hi kan duh lo tak zet,” a ti a. Hetiang thil hi a hmain a thleng tawh niin a sawi bawk.
Thil thleng hi sawiseltu zingah hian Israel-a US Ambassador Mike Huckabee-a pawh a tel a. Netanyahu-a pawhin, “He thil hian Lebanon leh khawvel hmun hrang hranga ringtute a tihnat avangin pawi ka ti tak zet,” a ti.
Zirtawpnia US rawtna anga Israel leh Lebanon inkarah inkahhai puan a nih hnuah pawh Israeli sipai sang tam takin Lebanon chhim lam hmun zau tak an luah chhunzawm zel.
Inkahhai puan a nih avang hian IDF leh Shia Muslim ralthuam keng pawl, Hezbollah inkara chawlhkar ruk inbeihna chu a tawp a, bawhchhiaah an inpuh tawn reng thung.
Hezbollah hian Israel leh US-in February 28-a Tehran an beih hnu ni hnihah Iran thlawpna atan Israel hi rocket-in an kap tan.
Israel hian March 2 khan Lebanon-ah sipai beihpui a thlak tan a, mi maktaduai khat chuang hmun him danga insawn an ngaih phah a, mi 2,290 chuang an thi tawh a, heng zingah hian naupang 177 leh damdawia thawk mi 100 an tel niin Lebanese thuneituten an sawi.
Israeli thuneitute pawhin hemi hun chhung vek hian Hezbollah beihna avangin Israeli sipai 13 leh civil mi pahnih an thi niin an sawi bawk.
Lebanon-a Isua lim tichhetu Israeli sipai hrem
