Leclerc beiseina a sang

Leclerc beiseina a sang
Kum 16 chhunga a vawikhatna atan Ferrari-in kumin hian F1 drivers’ title an la ve tawh ang tih ngaihdan neitu an awm a, chu chu nikum Formula One world championship title latu Red Bull driver Max Verstappen hnung chiaha runner-up Charles Leclerc kha niin, Thawhlehnia Italian team-in season thara an car hman tur an tlangzarhnaah a team behchhan Ferrari chunga a beiseina neih dan a sawichhuak.
Maranello lama Ferrari 2023 Formula 1 car tlangzarh tak hi a hmingah ‘SF-23’ vuah a ni.
Ferrari driver zinga World Cham-pionship title la thei hnuhnungber Kimi Raikkonen kuta 2007 driver title a luh hnu khan Italian team behchhan driver reng reng world champion an ni leh ta ngai lo a, kum 2010 leh 2012 khan Fernando Alonso chuan a teuh hle tih zawng a ni!
Kum 2022-a an season kha chu a hma kum hnih liamta ai chuan a kang dawrh a, competitive rilru an pu thei tawh a, intlansiak hmasa pathum an zawh rualin Leclerc khan nuamsa takin championship hma a hruai hial a, mahse, an strategy fuh lo leh harsatna dang dang avangin Red Bull an ngam lo.
An team principal hlui Mattia Binotto chhuah hma khan race management chungchangah tihsual an nei nawn fo a, Binotto pawhin a ban phah ta hial a, Alfa Romeo-Sauber lama khawsa thin Frederic Vasseur chuan a thlak ta a nih kha.
Kumin hian Leclerc chuan an car thar phochhuah a thlir a, an team tan kum tha a herchhuah ve leh tawh beiseina a neih thu sawiin, an car tharah factory lamin hna tha tak an thawk nia a hriat thu a sawi.
Monaco tlangval chuan, “Kan tum chu hnehtu nih a ni mai a, a chiang tawk a ni. Car vawn thuai thuai hlan ka nghakhlel a, championship hnehna chang tura fight hlan ka nghakhlel tawh a ni,” a ti.
Kum 25 mi hian car thar tlangzarh a nih hnua a vawikhatna atan Fiorano test track-ah kumin intlansiaka an hman tur Ferrari car thar a khalh chhin a, chumi zawhah a hmathlir sawiin, “Nikum kha hmasawnna tha tak a ni tawh a, kumin hian khati tala kan tlan that a ngai dawn a, championship title pawh kan beisei pha tawh turah ngai teh ang.
“Kei leh team-in kan target pui ber tur chu race hnehna tam thei ang ber chan a ni a, intlansiak hmasaber atanga a tawp thak thlenga nghet mar tha taka kan tlan theih kan beisei,” a ti.
A team-mate Carlos Sainz pawhin an car thar hi a enchhin ve bawk.
Tlangzarh inkhawmah Ferrari head of chassis Enrico Cardile chuan an car thar chungchang sawifiahin, nikuma an car hman atanga a tha zawk lo irhchhuak a nih thu sawi chungin a thar hlaka duanthat (completely redesigned) niin a sawi.
Ferrari hian engine lama nikuma harsatna an tawh thin ang kha an kalsan theih tawh beisei a ni.
Nikuma an harsatna avang khan Spanish leh Azerbaijan Grands Prix-a chak thei tura ngaih Leclerc tan kawng a pin phah a; 2023 season-ah erawh Monaco driver pawhin kum 16 chhunga Ferrari kuta driver title hmasaber a thlir ngam ta hial a nih hi!