Lee tana dilsaktu Son
Asian Cup khelh zawh tak semi-final pakhat zawka Jordan an hneh loh hma lawk dinner ei laiin South Korea player langsar pahnih captain Son Heung-min leh Paris Saint-Germain midfielder Lee Kang-in an inhnialbuai a, Tottenham skipper Son chuan a kutzungtang a tihnat phah a, a hnu lawk inkhel pawimawha an tlawm zui tak bawk avangin fans lamin Lee an sawisei nasa hle a, Son hian thupha a chawipui hial!
Son sawi danin, kha thil duhawm lo zet thlen hnu khan Lee hian a chipui leh ram tana a khelhpui ni bawk chu thupha chawi turin London-ah a kalhchilh vang vang a, boruak tha tak an neih zui leh tak hnuah Spurs player hian South Korean fans hnenah an lungawilohnate dahthaa Lee ngaidam turin a ngenpui.
Kum 31 mi Son chuan Instagram lamah puitling taka thuchhuah siamin, “Khati ang nungchang dik lo a lantir nawn tawh lohna’n national team-a senior player zawng zawngte bakah a khelhna club-a player-te’n a bik taka an kilkawi a ngai dawn a, ti chuan, mihring a nihna leh player a nihna zawnah amaha a tha zawk a lo chhuak thei ang.
“Kei ngei pawh ka la naupan zual zawk lai khan tihsual ka nei ve dem dum tawh a, ka career-a ka awmna tur awm takah ka awm nia ka hriat avangin thurawn leh kaihhruaina tha tak tak min petu veteran duhawmte lakah ka lawm hle a ni,” a ti.
Tarlan tawh thin angin, Asia khawmualpui huap football inelna sangber Asia Cup-ah khan kutzungtang auh vanga indim ngai chungin an player langsar ber Son khan a khelh a ngai a, sihnih faiin Jordan lakah Asian champion tum hnih ni tawh South Korea an tlawm a, final-ah Qatar chuan 3-1-in Jordan an hneh ve leh a nih kha.
Asian title pathumna tur a lakpui zawh loh hnuah thla 12 lek an rawih hman manager kum 64 mi Jurgen Klinsmann chu South Korea-in an ban a; Korea Football Association pawhin kum 23 mi Lee kha chak loh hnu team dinner-ah squad chhunga member naupang zawk thenkhat nen an teltir lo a, dinner eiho chuan table tennis-te an khelho!
Nimin khan Lee pawh hian thuchhuah siamin, “Kha mi ni dinner-ah khan ka tih ngai loh tawp tur ka lo ti palh a, pawi ka ti takzet a ni.
“Thawhpuite leh ka senior-te chunga nungchang pangngai zawk lanchhuahtir tawh ngei ka tiam a, ka thupha chawina min pawmsak a, min lo pawm leh duh avangin lawmthu ka sawi bawk e.
“Ka thluakah hian Son tana kha tournament pawimawhzia kha chu ka hre ve kur a, mahse, ka chetziain a lantir mawlh si lo. Chu lai tak chu kan harsatna bul chu a ni,” tiin thupha chawina thuk a tichhuak.
Lee nena an ding dun lai thlalak dahchhuak chungin Son pawhin a lo tuihnih ve thuai a, “Lee hian thling vit ngaih khawpin a chet dana inchhirna a lantir a, keimah telin national team-a player tinte hnenah tihtakzetin ngaihdam a dil a nih hi.
“Kha thil thlen hnu khan Lee hian hun harsa tak a tawk chho mawlh mawlh a, tunah chuan kan thinlung thilphalna keu hawng chungin vawikhat tal i han ngaidam hram teh ang u.”
Lee tana dilsaktu Son
