knaah Mizo MLA tel
Kumin June-a neih tur National Legislators’ Conference (NLC 2023) thlirlawkna leh sawihona – ‘3rd Visioning Exercise & Discussion on Various Aspects of 1st Historic National Conference 2023’ chu Inrinni khan Mumbai-ah neih a ni a, Mizoram atanga kal zingah MLA Dr Vanlalthlana a tel.
Mizoram MLA chuan NLC 2023 atana a rawtna sawiin, thupui thlanbik ho atanga thlirin hmun hrang hrang 40-ah thupui sawihona a awm dawn nia lan avangin, conference felfai tak a awm theihna’n a tel turte leh thupui sawi turten online registration tihfel nise; e-Neva hmang tawhte an state-a an chhawr tangkai dan sawina hun pek nise, mahni biala hmalakna thazual pholan tum a nih chuan State Assembly Secretariat leh state chhung university lian bera political science subject zirtirtute ngaihdan zawh ni se, zirchikna nei loa media leh website-a innghah lutuk hi a famkim tawk thei lo, tih te a sawi a ni.
NLC 2023 thlirlawknaah hian Lok Sabha speaker hlui Dr Meira Kumar chuan keynote address a pe a; MIT World Peace University executive president Dr Rahul V Karad chuan inlawmna thu a sawi bakah NLC 2023 kalpui dan tur a sawifiah. UP Legislative Assembly speaker Satish Mahana chuan sawihona kaihruaiin state hrang hranga ex-CM, Legislative Assembly speaker, Legislative Council chairman, MLA, MLC, Assembly Secretariat-a thawktute, industrialist leh mithiam hrang hrangten thupui sawihoin NLC 2023 lo awm tur atan an ngaihdan an thawhkhawm a ni.
Kumin June 16-18 chhunga neih tur NLC 2023 hi a vawikhatna tur a ni a; hemi atan hian MIT School of Government Pune chuan ruahmanna siamin, India ram puma Member of Legislative Assembly leh Member of Legislative Council te tel tura beisei an ni.