Lehkabu ziaktu naupang ber

Kum 4 leh ni 218 a upa a nihin a lehkhabu ziah an tlangzarh a, a lehkhabu ziah hi copy 1,000 an hralh tlin hnuah Guinness World Record chuan March ni 9, 2023 khan khawvela lehkhabu ziaktu naupang berah a puang.
He mipa naupang hi a hming cu Saeed Rsaed AlMheiri a ni a, Abu Dabhi, UAE a cheng a ni a, a lehkhabu ziah hi ‘The Elephant Saeed and the Bear’ tih a ni a, ramsa chi hnih mak taka an inkawmngeih tak tlat dan vel tarlanna a ni.
Saeed te chhungkua hi a pui ru ve hrim rim, tun tuma a lehkhabu ziah pawh hi a u, AlDhabi zara hetiang lama tui ve ta hi a ni a, a u pawh hi Guinness World Record holder niin, hmeichhe zinga bilingual (tawng chi hnih) a lehkhabu tlangzarh thei naupang ber niin, a kum lehah record dang, hmeichhe zinga bilingual book series tlangzarh thei hmasa ber a ni leh a, chutih lai cuan kum 8 leh ni 239 a upa chauh a la ni.
AlDhabi hian naupang kum 4 leh kum 10 inkar te Arabic emaw English emaw a lehkhabu ziak tura fuih phur tura hmalakna ‘Books from Children to Children’ te pawh a kalpui nghe nge a ni.
Saeed chuan, “Ka unau hi ka ngaina em em a, ani nena inkawm reng mai hi ka thlahlel thin. Lekha chhiarin, kan ziak a, milem te kan ziak a, thil chi hrang hrang kan tidun thin. Amah entawnin lehkhabu hi ka ziak ve a, keima tawka lehkhabu ziah ve theih ka inrin vang a ni,” a ti.
Saeed chuan a lehkhabu chhung thu sawiin, “Sai pakhat, Saeed leh vur ram savawm chanchin a ni. Sai te chu an picnic a, chutah chuan savawm a hmu a. Savawm chuan a seh dawn emaw a ti a, mahse, a tawpah chuan sai chuan a ngilneihna lantirin savawm hnena chuan ‘picnic dun ang!’ tiin a sawm ta a! Tichuan tian tha tak an lo ni ta a ni,” a ti.
A nu leh a unaunu te kaihruainain ziak leh chhiar a zir a, reilote hnuah ama inrawm chhuak thawnthu a nei ta mai a ni. A thawnthu ziaha character te chu an lem ziah te nuam a ti a, “Lemziah hi a har ve duh a, a vawi khatnaah chuan savawm khan a hlauhawm hmel em em mai a, mahse, milem ziah hi a nuam ve hrim hrim,” a ti bawk.
A record siam chungchang an zawhna chhangin Saeed chuan, “Ka u AlDhabi angin thil tha tak ka ti ve hi ka hlimin ka inchhuang ve em em a ni. Ka thian ten kan lawmpui hian nuam ka ti bawk thin,” a ti.
Lehkhabu ziah chu chawlhsan mai a tum lo, tun ami hi a bul tanna chauh a ni a, tunah chuan a lehkhabu pahnihna tur pawh a buaipui leh tan tawh niin a sawi a, lehkha chhiar leh ziah te bakah midang thawnthu hrilh te chu a nuam tih zawng a nih thu a sawi bawk.
He mipa naupang kum li mi hian mathematics pawh a tuipui hle a, a nu nena mathematics han chawh vel te chu nuam a ti hle thin. Record dang siam leh a tum em, tia an zawhna chu, “Tehreng mai!” tiin a chhang a, “A phurawm alawm, tuna mi hi ka nuam tih zawng tak a ni lehnghal. Record dang siam leh ngei a chakawm a, ka tih theih ngei ka ring bawk,” a ti.