Daily Newspaper

Lehkha chhiar taima Remsiami

POST NEWS SERVICE

16

Mizoram hmeichhiate zinga Olympian hmasa ber Lalremsiami Hmar hian hockey lamah chauh ni lo, thil dangah pawh chanchin ngaihnawm tak a nei a, lehkha chhiar taima tak a nihna te hi sawi tham a awm.

Tokyo Olympics-ah hian hmarchhak atangin palai pariat an tel a, an zinga mi Remsiami hi lehkha chhiar taima, an training lai pawha lehkhabu inchhawp dul thin mi a ni.

Tokyo Olympics hi 2020-a neih tur, hri vanga sawn hlat a ni a, hei vang hian India hmeichhe hockey team-a tel tur pawh an thlang har. Nikum lam atang daih tawh khan Bangalore-ah mi 60 an ‘camp’ a, June ni 17 khan an inthlang fel chauh. Bangalore-a an camp lai hian Remsiami hian lehkhabu a inchhawp dul a, Tokyo-a kal tur an puan lai vel kha Dr C Lalhrekima ziah “A ho tlat” tih leh Vanneihtluanga ziah “Hnehna Hlado” tih bu thenkhat a chhiar lai a ni.

“Hnehna Hlado” hi bu khatna atanga a chhiar zel thu a sawi a, “A ho tlat” tih hi a chhiar nawn thu a sawi bawk.

Inkhelin hmun hrang hrangah an zin a, Railway-ah hna a thawh avangin Mizoram pawnah a awm hrim hrim bawk. Chuti chung chuan Mizo lehkhabu hi a theih ang angin a lakhawm a, a chhungte’n an thawn bakah Mizorama a haw changin a leikhawl thin bawk.

‘Lehkhabu lar deuh hi chu ka chhiar ve deuh zel,’ a ti a, hunawlah a chhiar thin thu leh training hautak tak an neih lai pawha a chhiar thin thu te sawiin, rilru tihhahdam nan a duh thu te a sawi.
Shiv Khera ziak “You can win” tih bu a tangkaipui thu leh a chhiar nawn thin thu a sawi a, a lehkhabu duh ber chu Bible a nih thu a sawi.

Khawiah pawh zin se Bible a keng a, a remchan hunah a chhiar thin. India team-a a thiante pawhin lehkha chhiar a taima tih leh Bible a chhiar thin tih hi an hria a, India team captain Rani Rampal pawh hian interview a neih tumin Remsiami’n Bible a chhiar taimak thu hi a sawi tawh.

“Ka lehkhabu chhiar hi ka tangkaipui a, ka sawi thiam lo zawk,” Remsiami chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy