Lehkhapuan hmangin thlawhtheihna lem hi chu kan siam deu fur tawh ang a, mahse, Guinness World Record siam theihna khawpa lian chu kan la siam lo ang. Siam pawh tum ila a hautak ve dawn tlat. Pisa-a zirlai rual chuan record an siam ta alawm, khawvela lehkha thlawhtheihna lem lian ber an siam a, meter 7 (feet 23) a sei niin, a thla hmawr inhlat zawng meter 20.04 (feet 65.8) niin, kg 28.49 a rit a ni a, meter 59 (feet 193.6) a thui an thlawh tir thei a, Guinness World Record a siam ta a ni. Record siam tur chuan thlawhtheihna lem hi a thlawh theih ngei a ngai a ni.
He record siamna a phusa deuh pakhat, science communicator leh thil lem siam lama mithiam Jakidale (Jacopo D’Alesio) chuan, “Pisa-ah kan inhmukhawm chu kan phur nghal hle a, lehkhapuan, thilcharna (glue) nen kan thawkchhuak a, tunhmaa thil la awm ngai lo thlawhtheihna lem lian siam tumin kan phek buai ta a ni,” a ti.
An thlawhtheihna lem siam hmingah hian ICARUS an ti a, a lenzawng mai bakah hian a siamdan leh nihphungah aeronautical engineering nena inzul thei ang berin an duang a. Zirlaite chuan he project atana an lehkhapuan hman ral zawng zawng chu kg 300 chuang niin an sawi a, an charna Vinavil Pro glur pawh kg 60 vel zet an hmang a, hei hi tui nena chawhpawlh chi a ni. A structure a a khawng deuh theih nan 120 g/m² paper an hmang a, chu chu 40 g/m² paper-in an khuh leh a ni.
Thlawtheihna lem lianpui siam se, a thlawh theih leh si loh chuan record a siam thei chuang lo, meter 3 (feet 9 leh inches 8) a sang platform atangin an thlawh tir ang a, meter 15 (feet 49) tal a thlawk thei ngei tur a ni a, mi pakhat chauhin a thlawhtir tur a ni bawk.
Lehkha hmanga thlawhtheihna lem lian ber an siam
