“Result tha tak tak nei chho zel mah ila, kan zir dan system erawh kan inenfiah deuh deuh a ngaiin a lang; a chhan chu central competitive exam-ah kan tling hlei thei lova; exam ringawt erin kan zir thin em ni a tih theih..”
Hei hi chief minister Lalduhoma thusawi a ni a; HSSLC leh HSLC Examination, 2024 toppers te hnena Chief Minister’s Award semna a hmanpuinaah a sawi.
Mizoram atanga IAS tling hnuhnung ber kha Grace Lalrindiki Pachuau (TN: 2013) a ni a, tunah kum 10 a vei leh ta. Kum 10 chhung hian college leh university atanga result tha tak tak nei Mizo thalai rual thahnem tak an chhuak hum hum reng a, central competitive exam-ah an tling hlei thei lo. All India Service-a lo tling tawh chief minister meuh pawhin, ‘kan zir dan system enfiah ngai’ anga a sawi tawh chuan inenfiah a, zir dan system te pawh chu engtin emawa her danglam a ngai viau tawh pawh a ni ngei ang.
Kum sawm chuang kalta 2009-ah khan, khatih laia sawrkar khan education system kha thlak danglam tulin a hria a, Education Reforms Commission kha a din a. Kum khat hnuah ERC report peihfel a ni a, chu chu sawrkarah thehluh niin sawrkar pawhin report chu a pawm a. Report dungzuia kal dawn chuan cheng vaibelchhe 200 vel sen a ngai dawn a, chu chu state-in a tlin leh ta lo va.
Chumi hnuah Right to Education Act-in a phut angin Continuous and Comprehensive Evaluation (CCE) kalpui a ni leh a. Hei hi state dangte chuan an kalpuina a rei tawh a, mahse Mizoramin kan han kalpui ve a, a nihna tur angin kan kalpui leh hleithei lo.
Tunah chuan a ler lamah kan thuai leh ta chiam mai a. College zir zawhah Super IAS coaching etc.. kan ti leh a; a tha lo chu a ni hauh lo, mahse a bul lama kan zirna system-in a zir miau loh avangin, a zung lam atanga thang tha tawh lo na na na chu, a ler lamah tui leih chiam mah ila, rah tha a chhuah hleithei tawh lo a ni ber mai.
Mahni tawng ngeia zirlai inhrilhfiah hi hriatna a nghet bik. System dang dang chu enfiah ngai awm bawk mah se, teaching method leh learning method hi sum seng miah lova her danglam mai theih a ni; hei hi chu enfiaha tihdanglam nghal mai theih niin a lang.
Lehkha zir dan system enfiah ngai…
