Site icon The Aizawl Post

‘Lehkhabu Chhiar Ni’

Kar kalta Zirtawpni khan Serchhipa DIET, District Bawrhsap leh MJA ten DIET tualah “Lehkhabu Chhiar Ni” an huaihawt a. He hunah hian DIET zirlaite leh thawktute bakah middle leh primary school zirlaite, zirtirtute, leh Serchhipa chanchinbumiten lehkhabu an chhiar a ni.

Lehkhabu chhiar uar tura zirlaite leh thalaite fuihna thu hi chuan Mizoram hi a tuam chhuak tawh ti ila, a dik awm e. Chutih laiin, thua sawi leh infuih ringawt hi a tawk lo va, a tak (practical)-a kalpui nghal hi a pawimawh thin a. Serchhipa lehkhabu chhiar ni huaihawt theih a ni hi lehkhabu chhiar uar tura infuihna kawnga hmasawnna rahbi pawimawh tak a ni a, thil tha hi chu intihhmuh ila, inentawn thiam ila, district tinah hetiang hian uar takin kalpui thei ila, a thua lehkhabu chhiar tam tura infuihna tihhlawhtlinna tur a ni ang a, chu chu kan thatpui tlan dan tur pawh a ni ang.

Zirlaite hian zirtirtute thu hi an awih ber a, chuvangin zirtirtuten zirlaite lehkhabu chhiar tur an bituksak thiam a pawimawh dawn hle a. In lamah mobile phone khala hun an khawhral thin thlak nan pawh thil tha tak a nih a rinawm a. Lehkhabu tha, zirna pui thei tur lamhawi (hnam thil kaihhnawih lam lehkhabu tam tak a awm) thlansak a, chu chu school-in kar tina co-curricular activities an neih niah zirlaite chawhphur nan hman thin ni se, chu chuan awmzia thui tak a nei awm e.

Hei bakah hian, YMA branch tin hian thalaite pualin ‘lehkhabu chhiar ni’ te huahawt thin se, chu chuan awmzia thui tak a nei thei bawk awm e. Sap thufingin ‘something is better than nothing’ a lo tih angin, lehkhabu chhiar uar tura a hnam pum anga kan veina tihhlawhtlinna kawngah, tih loh tawp aiin thil engemaw ber, lehkhabu chhiar ngaina tura thalaite kaihhruaina lamhawi hi chu ‘tih’ a ngai ta a ni ber. A sawia sawi lam hi chu kan intodelh viau tawh; chutih laiin thu tisaa chantir tura a taka thawchhuahpui lamah erawh hmalakna tur kan la ngah hle niin a lang.

Exit mobile version