Daily Newspaper

Lei dawh thar pahnih E-in-C in hawng

54

Serchhip bul Mat lui phaia Chawm zau panna kai – Chawm Kai tia sawi hmuna thir lei (Galvanised Bailey Bridge) leh Thenzawl leh Buarpui inkara Tlawng lei (Steel D-Bow Trussed Girder Bridge) dawh thar chu Zirtawpni khan Mizoram PWD engineer -in- chief K Lalsawmvela’n a hawng.

PWD hotute chuan lei pahnihte hi PWD changtu chief minister-in hawng se an duh laiin hrileng vangin beisei angin an buatsaih thei ta loa. Chief minister ruahmannain engineer -in- chief hoin hawn a ni ta tih an sawi.

Lei hawngtu Er K. Lalsawmvela chuan PWD-in hmun tam taka lei a lo dawh tawhte chu khaw karkawng lei an nih deuh vek laiin, tun tuma Chawm lei chu loneitute fehkawng a nih avangin a danglam bik tih a sawi a. Lei dang an hawn, Galvanised Bailey Bridge chu Mizorama a pahnihna a ni, tiin, Mizoram PWD-in a dawh hna a thawh hmasak ber a nih avangin a hlu hle tih a sawi bawk.

“He lei hi kum 20 chhung chu engmah tuaithar ngai loa tha tura beisei a ni a. Amaherawh chu a thir tichhe thei thilte kan tih hnan fo erawh chuan a danglam thei thung ang,” a ti a. Mizoramah lei 162 a awm mek thu leh dawh mek 26 a awm thu a sawi.

Chawm lei hi NEDP 2018-2019 sum nuai 513 hmanga thawh a ni a. Sub soil investigation te tiin foundation hna thawh zui a ni a. Lei innghahna tur (abutment) pawimawh te thawh fel a nih hnuah a thir lei chin – super structure dawh hna hi Garden Reach Shipbuilders & Engineer Ltd. Kolkata chuan kumin April 1 khan a thawk tan a, hun tiam chhung – April 15-ah an zo a ni. Lei sei zawng hi feet 180 a ni a, a zau zawng feet 10.9 a ni. Double Double Reinforced Galvanised Bailey Bridge Steel Decking a ni a, a tuiek thei lo tura ngaih a ni.

Lei hian quintals 200 (MT 20) a rit dawl zo tura ngaih a ni a. Lirtheite chuan zawimuangin (10 km per hour) in an zawhkai tur a ni a, leiah an ding khawmuang thiang lo a ni. He lei hi Zawlpui leh a chhehvel Zau, thlai chinna hmunpuia hnathawktu chhungkaw za chuangten tangkai takin an hmang thei dawn a, heng Zau atang hian buh leh sangha bakah thlasik thlai atang ringawt pawh kumtin cheng nuai 400 man vel tharchhuah thin a ni.

Chawm kai lei hawn zawh hian Thenzawl leh Buarpui inkar Tlawng luia dawh Steel D-Bow Trussed Girder Bridge chu PWD E-in-C hian a hawng leh a. He lei hi Serchhip leh Buarpui inkar kawng laihzauh leh siamthat hna Asian Developmen Bank loan hmanga NE States Road Investment Programme Scheme hmanga thawh mek chhunga mi a ni. He hna consultant hi MSV International Inc. USA niin contractor chu M/s Tantia Construction Ltd. Kolkata a ni. Lei sei zawng hi meter 63 niin cheng vaibelchhe 19.50 senga dawh a ni. Thir ruhrel tha tak leh a chhuat concrete niin a lei thir rih zawng hi metric ton 250 a ni. Leiin a dawl zawh chin hi metric ton 100 a ni a. Lei design-tute hi Blue Hill Engineering Aizawl niin IIT Kharagpur-in a endik leh vek a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy