India sorkarin Mizoram leh Myanmar inkalpawhna kawng a khar khauh telh telh a, inkalpawh a har tawh hle. Lei kana ral leh lama kal thei lo an tam a, lei kan hi Champhai district-a chengte chauh phalsak an ni.
India sorkara Ministry of Home Affairs (MHA) lehkha, kum hlui December ni 24-a mi leh Mizoram sorkara home department lehkha, kum hlui December ni 30-a mi angin January ni 3 khan Champhai police te’n inkalpawh chungchangah hian thuchhuah siamin, inkalpawhna hmun pawimawh Zokhawthar leh Hnahlanahte lekkawh nghal a ni a, kum tharah inkalpawh a har nghal hle.
Sorkar thu angin Mizoram atanga Myanmar-a kal tur leh Myanmar atanga Mizorama kal tur hian Border Pass neih a ngai a, Border Pass chu ramri atanga km 10 china mite chauhvin an nei thei ang tih a ni.
Zokhawthar VC president Lalmuanpuia chuan tuna an dan thar hian mipui a tihbuai thu a sawi a, lei kana inkalpawh pawh an tlem tawh thu a sawi bawk.
VC president hian a tirah Border Pass a pe a, January ni 7 atang khan hemi buaipui tura police an awm tak avangin police-in pass hi an pe tawh. Assam Rifles-in lei kan turte hi an lo endik thin.
VC president sawi danin, Border Pass nei tan pawh intlar a ngai a, hun a heh avangin kir leh an awm a, Border Pass neiah pawh Champhai District mi ni lote chu Assam Rifles hian an lo kirtir thin. Aadhar card emaw E/Roll ID card emaw a ngai a, chumi hmang chuan Champhai District mi leh mi lo hi an lo thliar thin.
“Inkalpawh mamawh reng hi kan ni a. Hmawmsawm leh eichawp thil lei turin a lehlam lehlam kan inkalpawh a ngai a, chhungkaw thila inkalpawh a ngai bawk a, chutiang chu kan ti thei ta lo a, a buaithlak khawp mai,” Lalmuanpuia chuan a ti.
“Lei kana veivak hi 50% dawn chuan a hma aiin an tlem ang. Kan inkalpawh thei lo a ni ber tawh,” a ti a, pass a pek lai pawhin district dang mi a pekte chu Assam Rifles-in an lo dang zel tih a sawi bawk.
Zokhawthar bula lei, Mizoram leh Myanmar lam inkalpawhna pawimawh hi nikum July ni 25 atang khan bungraw thiar luh khapin, mihring inkalpawh chauh phal a ni tawh hrim hrim a, hei hian sumdawnna nasa taka a nghawng bakah Zokhawthar leh Myanmar lama Zo hnahthlakte a nghawng hle. Insumdawn tawn theih a nih tak loh avangin mi engemaw zatin an hna an chan, Lalmuanpuia chuan a ti.
“Mihring kan pung a, raltlan engemaw zat kan mikhual a, mi engemaw zatin hna an chan thung a. Ei leh bar lamah kan khua min nghawng hle,” a ti.
“Aadhar card emaw E/Roll ID card emaw an lo phut hian mi engemaw zat a tibuai a, raltlante chuan lui an kan ve thei tawh lo tihna a ni mai a,” a ti bawk.
Sipai sorkar leh anmahni paih tumtute an indo avangin Myanmar lam an buai reng a, Zokhawthar hnaih Myanmar lam hi sipai sorkar an inhnuhdawh tawhna a nih avangin sorkar tia sawi tur an awm rih lo. Hualngo People’s Organisation-in an awp a, anni hian Mizorama lut turte hi Border Pass an lo pe mai thin.
Myanmar lama kal tum, kir leh mi engemaw zat an awm thin a, Border Pass neiah pawh rei deuh deuh nghah a ngaih thin avanga kir leh an awm thin tih thu dawn a ni.
Lei kan thei lo an tam, Chmphai District chauh phalsak
